2026 jyldyń 14 sáuír kúní ótken «Rejısser jáne ūstaz Ersaıyn Ábdírahmanovtyń mūrasy» atty dóńgelek ústelde onyń ūlttyq anımatsıya men derektí kıno óneríne qosqan zor úlesí jan-jaqty talqylandy.
Qazaq ekran ónerínde ózíndík qoltańbasyn qalyptastyrǵan sheberdíń shyǵarmashylyǵy kórermenderdíń jadynda saqtalǵan. Onyń «Boztorǵaı», «Qozy men Qosayaqtyń jaqsylyq ízdeuí», «Qyzǵylt eshkíler elínde» atty anımatsıyalyq fılmderí altyn qorǵa engen tuyndylar retínde joǵary baǵalanady. Keıín rejısser derektí kıno salasynda da tabysty eńbek etíp, «Jańa Arqa», «Ólím tranzıtí» sekíldí mańyzdy jobalardy júzege asyrdy.
1993–2001 jyldary Temírbek Júrgenov atyndaǵy qazaq ūlttyq óner akademıyasy kıno fakultetíníń dekany qyzmetín atqaryp, kıno óndírísínde ǵana emes, bílím beru salasynda da eńbek ettí.
Dóńgelek ústel barysynda rejısserdíń qazaq anımatsıyasy men derektí kınonyń qalyptasuyndaǵy rólí, onyń kórkemdík jáne ádísnamalyq ūstanymdarynyń búgíngí kıno bílímínn berer mańyzy keńínen sóz boldy. Sondaı-aq, onyń pedagog retíndegí eńbegí men shákírt tárbıeleudegí ūstanymy erekshe atap ótíldí.
Aıta keteıík, Temírbek Júrgenov atyndaǵy qazaq ūlttyq óner akademıyasy qabyrǵasynda ótken ís-shara ayasynda rejısserdíń fotosuretterí men grafıkalyq jūmystarynan kórme ūıymdastyrylyp, «Rejısser Ersaıyn Ábdírahmanov» atty monografıyasynyń tūsaukeserí óttí. Sonymen qatar, onyń derektí fılmderí men «Boztorǵaı», «Qozy men Qosayaqtyń jaqsylyq ízdeuí» anımatsıyalyq tuyndylarynyń kórsetílímí kórermen nazaryna ūsynyldy.
Nūrgúl Abdolla
«Rejısser Ersaıyn Ábdírahmanov» atty monografıyasynyń avtory:
- Osy kúnge deıín ókíníshke oraı Ersaıyn Ábdírahmanovtyń anımatsıyalyq fılmderínde qoldanylǵan sanauly ǵana quyrshaqtary saqtalǵan. Olardy bíz kórmege ūsyndyq. «Batyr Bayan» fılmínde suretshí bolyp jūmys jasaǵandyqtan, qalǵan eskızderínde saqtap, kórmege qoıdyq. Búgíngí ís-shara qonaqtarǵa, akademıya studentteríne tanymdyq kesh bolady degen senímdemín. Monografıyalyq eńbekke keletín bolsaq, kítapta Ersaıyn Ábdírahmanovtyń túsírgen fılmderí men multfılmderíne tereń taldau jasalǵan. Mamandyǵym kınotanushy bolǵandyqtan, būl eńbekte kásíbı kınotanushylyq taldau da júrgízíldí. Bíz rejısserdí joǵary dárejede dárípteuímíz kerek. Sebebí, onyń shyǵarmashylyǵynda dostyq, jaqsylyq pen jamandyq, otbasylyq máseleler ashyq árí aıqyn kóterílgen. Derektí fılmderínde de Qazaqstandaǵy 90 jyldary oryn alǵan oqıǵalar kórínís tabady.
Búgíngí kesh joǵary deńgeıde ótedí dep senemíz. Jaqyndary, tuysqandary, áríptesterí jáne jary Qatıra Orynbaeva keshímízdíń qadírlí qonaqtary bolmaq.
Qatıra Orynbaeva
Ersaıyn Ábdírahmanovtyń jary
- Arada 25 jyl ótse de bet-beınesín, eńbekterín baǵalap, qūrmettep jatqandaryńyzǵa kóp raqmet! Keleshekte jetkínshek jastar būl eńbekterdí óz paıdalaryna qoldanyp, dárípteıdí dep senemíz. Ómírden ótkeníne 25 jyl zu ótíp óte shyǵypty. Ol óte balajandy, otbasyn jaqsy kóretín adam bolatyn. Árdaıym qoldap-qorǵap júretín. Dostary, áríptesterí men akademıya ūjymyna alǵysym sheksíz.
Ersaıyn Ábdírahmanovtyń shyǵarmashylyǵy – ūlttyq ekran ónerí tarıhyndaǵy aıryqsha qūbylys. Onyń eńbekterí qazaq anımatsıyasynyń kórkemdík órísín keńeıtíp qana qoımaı, derektí kınonyń qoǵamdyq mánín tereńdete tústí. Onyń esímí qazaq kıno mádenıetínde rejısser, suretshí, pedagog árí ūlt ruhanıyatyna adal qyzmet etken tūlǵa retínde máńgílíkke saqtalady.
Zere Seısenqyzy
T.Júrgenov atyndaǵy Qazaq ūlttyq óner akademıyasy KINO jáne TV fakultetí «Anımatsıya rejıssurasy jáne ınteraktıvtí medıa» kafedrasy Medıajurnalıstıka mamandyǵynyń 3-kurs studentí.