Ázerbaıjan prezıdentí Ilham Álıev Qazaqstan Prezıdentí Qasym-Jomart Toqaevqa alǵysyn bíldírdí. Būl turaly ol X áleumettík jelísínde jazdy, – dep habarlaıdy aqshamnews.kz tílshísí.
"Men Iran tarapynan Nahchyvanǵa jasalǵan soqqylardy aıyptaǵany jáne Ázerbaıjan men Qazaqstan arasyndaǵy bauyrlastyq árí odaqtastyq qatynastar ruhynda elímízdí qoldaǵany úshín Prezıdent Qasym-Jomart Toqaevqa alǵysymdy bíldíremín", - dep jazdy Álıev.
Eske salaıyq, 5 nauryzda Irannan ūshyrylǵan drondar Nahchyvan qalasyndaǵy áuejaı aumaǵyna qūlaǵan. Ázerbaıjannyń Syrtqy íster mınıstrlígí osy oqıǵa saldarynan áuejaı ǵımaraty zaqymdanyp, bírneshe beıbít tūrǵyn zardap shekkenín málímdedí.
Nahchyvan qalasyndaǵy áuejaıǵa ırandyq drondar shabuylyna baılanysty Prezıdent Qasym-Jomart Toqaev óz ūstanymyn bíldírdí. Ol būl árekettí "bauyrlas, odaqtas Ázerbaıjanǵa" qarsy jasalǵan qadam retínde qatań aıyptady.
"Sonymen qatar, Memleket basshysy Iranmen bírlesíp, oqıǵany mūqıyat tergeuge, sondaı-aq óńírdegí shıelenístíń ushyǵuyna jol bermeu úshín janjaldy dıplomatıyalyq jolmen retteuge úmít bíldírdí", - delíngen habarlamada.
Al Tegeran Ázerbaıjan baǵytyna drondar ūshyrylǵanyn joqqa shyǵaryp otyr. Iran Bas shtaby mūndaı áreketterdí būǵan deıín Izraıl mūsylman elderí arasyndaǵy qarym-qatynasty nasharlatu maqsatynda jasaǵanyn da málímdedí. Al Ázerbaıjan óz kezegínde Iranǵa jauap sharalaryn qoldanatynyn eskerttí.
