Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
Ulttyq jumyspen qamtý jospary 73 paıyzǵa oryndaldy
Úkimet málimetinshe, 3,3 mln azamatty jumysqa ornalastyrý maqsatyna qol jetkizý úshin 2029 jylǵa qaraı kásipkerlikti qoldaý, ınvestısıalyq jobalardyń monıtorıńi jáne sıfrlyq ekojúıeni damytýdy qosa alǵanda, sharalar kesheni iske qosyldy. Jyl basynan beri 480 myńǵa jýyq adam jumys tapty.
Kóleńkeli ekonomıkadan 28 mlrd teńgeden asa qarajat shyǵaryldy
2021 jyldan bastap azamattar men bızneske kórsetiletin qyzmetterdiń sapasyn jaqsartýǵa baǵyttalǵan sıfrlyq sheshimder kesheni engizildi.
Bul kóleńkeli ekonomıkadan 28 mlrd teńgeden asa qarajatty shyǵaryp, 13 mlrd teńgeden astam búdjet qarajatyn únemdeýge múmkindik berdi. Engizilgen sheshimderdiń jalpy tıimdiligi 51,3 mlrd teńge boldy.
Keıingi eki jylda 340 mektep paıdalanýǵa berildi
Oljas Bektenov bilim berý mekemeleriniń qurylysy men jańǵyrtý jumystary qarqyndy júrip jatqanyn aıtty. «Keleshek mektepteri» jobasy aıasynda 310 myń orynǵa arnalǵan 160 mektep boı kóterdi.
2024-2025 jyldary barlyǵy 484 myń orynǵa arnalǵan 340 mektep paıdalanýǵa berildi. Jyl aıaǵyna deıin 111 mektep salý josparlanyp otyr.
Grant, jataqhana men stıpendıa
Bıyl joǵary jáne joǵary oqý ornynan keıingi bilimi bar kadrlardy daıarlaýǵa 93 myń grant bólindi.
Bıyl 3,5 myń orynǵa arnalǵan 4 jataqhana iske qosyldy. Jyl aıaǵyna deıin taǵy 10 myń oryndyq 29 jataqhana ashý josparlanyp otyr.
2024 jylǵy qyrkúıekten bastap bakalavrıat stýdentter shákirtaqysy 20%-ǵa, al magıstranttar men doktoranttar shákirtaqysynyń mólsheri 15%-ǵa ósti.
Qazaqstanda jyl basynan beri náreste ólimi 22,7 paıyzǵa tómendedi
"Biz 2029-shy jylǵa qaraı halyqtyń ómir súrý uzaqtyǵyn keminde 77 jylǵa jetkizý maqsatyna birtindep jaqyndap kelemiz. Byltyrdyń qorytyndysy boıynsha ómir súrý uzaqtyǵy alǵash ret 75 jyl 4 aıǵa jetti. Memleket basshysynyń qoldaýy men turaqty nazarynyń arqasynda densaýlyq salasyndaǵy negizgi kórsetkishterdi jaqsartýǵa qol jetkizildi", — dep atap ótti Oljas Bektenov.
Jeke ınvestısıalar esebinen Almaty, Shymkent jáne Qyzylordada úsh jańa jolaýshylar termınaly salyndy. Bul olardyń ótkizý qabiletin 6,5 esege arttyrýǵa múmkindik berdi.
Qazir Memleket basshysynyń tapsyrmasy boıynsha Zaısan, Kendirli jáne Qatonqaraǵaı kýrorttyq aımaqtarynda úsh jańa áýejaıdyń qurylysy, sondaı-aq Arqalyq qalasyndaǵy áýejaıdy qalpyna keltirý jumystary júrip jatyr.