Atyrauda ózín "haker" dep tanystyryp, áleumettík jelíde joǵalǵan otbasyǵa qatysty túrlí nūsqalar taratqan er adam Interpol arqyly halyqaralyq ízdeuge jarıyalandy, dep habarlaıdy Aqshamnews.kz tílshísí.
Atyrau oblystyq polıtsıya departamentí atalǵan azamattyń halyqaralyq deńgeıde ízdeude júrgenín resmı rastaǵan. Qūqyq qorǵau organdary onyń alayaqtyq boıynsha aıyptalyp otyrǵanyn, aldyn ala derek boıynsha shetelde boı tasalap júrgenín habarlaǵan.
Polıtsıya ne deıdí?
Polıtsıya būǵan deıín "hakerdíń" áleumettík jelíde jarıyalaǵan "óz zertteuíne" qatysty píkír bíldíríp, onyń qarjylyq aǵymdar men basqa da derekter turaly aıtqandary shynaıylyqqa sáıkes kelmeıtínín málímdegen. Sonymen qatar vedomstvo resmı derekkózderge ǵana súıenudí sūrap, jalǵan aqparat taratqany úshín zań boıynsha jauapkershílík qarastyrylǵanyn eskertken.
Polıtsıyanyń aqparatynsha, atalǵan adamǵa qatysty būǵan deıín alayaqtyq faktílerí boıynsha tórt qylmystyq ís tírkelgen, tergeu jalǵasyp jatyr.
Atyraudaǵy jaǵdaıdyń jaı-japsary
Eske salsaq, 6 qańtarda Atyrau oblysynyń Jangeldın auylynan 66 jastaǵy Maqsot Qarabalın men 64 jastaǵy jūbaıy Nasıp Úteshqalıevanyń máıítí tabylǵan. Ís boıynsha basty kúdíktí retínde marqūmdardyń 29 jastaǵy kúıeu balasy Sūltan Sársemálıev atalady. Ol da halyqaralyq ízdeude. Al marqūmdardyń kenje qyzy Aqbayan Mūqanǵalıeva habar-osharsyz ketkender retínde halyqaralyq ízdeuge jarıyalanǵany aıtyldy.