Qojaıyn kólik esigin qulyptamaǵan
Atyraýda bótenniń kóligin urlap, aıdap ketken 24 jastaǵy jigit ustaldy, dep habarlaıdy Almaty-akshamy.kz oblystyq Polısıa departamentiniń baspasóz qyzmetine silteme jasap.
Polısıa departamenti usynǵan derekterge qaraǵanda, kólik 4 qarashada Atyraý qalasynda urlanǵan.
«Bul týraly saǵat 12:22 shamasynda «Toyota Highlander» markaly kóliktiń ıesi – 28 jastaǵy azamatshadan 102 operatory arqyly shaǵym tústi. Ol sol kúni saǵat 11:20 shamasynda B.Momyshuly kóshesinde ornalasqan emhananyń aldyna qara tústi «Toyota Highlander» markaly avtokóligin qaldyrǵan. Biraq, keıin emhanadan shyqqan kezde kóligin taba almaı qalǵan», - delingen habarlamada.
Shaǵymdanýshynyń habarynan keıin jedel basqarý ortalyǵy men patrúldik polısıa qyzmetkerleri jedel izdestirýge kiristi.
«Jedel basqarý ortalyǵynyń qyzmetkerleri «Sergek» júıesiniń beınebaqylaý kameralary arqyly urlanǵan avtokóliktiń júrý baǵyty anyqtady. Al, polısıa qyzmetkerleri kólikti Sh.Ýálıhanov kóshesiniń boıynda toqtatyp, ony zańsyz júrgizip ketken 24 jastaǵy er adamdy ustady», -dep habarlady departamenttiń baspasóz qyzmeti.
Keıin belgili bolǵandaı, ıesi kóliktiń kiltin otaldyrý tetiginde qaldyryp, esigin qulyptamaǵan. Qazir bótenniń kóligin urlap, aıdap ketken kúdiktige qatysty QR Qylmystyq kodeksiniń 200-babynyń 1-bóligimen (Avtokólikti zańsyz aıdap ketý) qylmystyq is qozǵaldy. Sotqa deıingi tergeý bastaldy.