Májílís deputaty Maqsat Tolyqbaı jalǵan ataq pen medal taratudy "qauíptí dertke" teńep, Úkímetten naqty árí qatań sharalar qabyldaudy talap ettí. Deputat premer-mınıstrdíń orynbasary – mádenıet jáne aqparat mınıstrí Aıda Balaeva atyna joldaǵan deputattyq saualynda marapat ınstıtutynyń bedelí qūnsyzdanyp bara jatqanyn málímdedí, - dep habarlaıdy aqshamnews.kz tílshísí.
Májílís mínberínde kóterílgen deputattyq saualda keıíngí jyldary elde ataq pen marapattyń "bıznestík tauarǵa" aınalǵany qatań synǵa alyndy. Deputattyń aıtuynsha, aty-jóní belgísíz qoǵamdyq ūıymdar túrlí orden-medal men ataqtardy ashyq nemese jasyryn túrde satyp, ony saltanatty shouǵa aınaldyrǵan.
"Ataǵy joq, medal almaǵan kím qaldy? Ataqqūmarlyq kádímgí dertke aınalyp barady. Marapat pen ataq – bazarda satylatyn suvenır sıyaqty", – dedí deputat.
Saualda keltírílgen derekterge súıensek, "Qazaqstannyń qūrmettí azamaty", "Qazaqstannyń eńbek síńírgen qyzmetkerí", "Ūlt ūstazy" sıyaqty ataqtar 20 myńnan 100 myń teńgege deıíngí aralyqta "baǵalanady". Aqshasyn tólegen adamǵa medal, orden, kuálík jáne sahnalyq marapattau rásímí qosa ūsynylady.
"Ózderí máz. Shyn mánínde ne ataq alyp jatqanyn ózderí de bílmeıdí. Áleumettík jelíge salyp, qyzuy basylǵansha toılaumen álek", – dep atap óttí Maqsat TOLYQBAI.
Deputat būl qūbylystyń eń qauíptí tūsy – jalǵan marapattardyń bílím beru salasyna enuí ekenín basa aıtty. Onyń aıtuynsha, búgínde mūǵalímníń kásíbı deńgeıí bílím sapasymen emes, alǵys hat pen medal sany arqyly ólshenetín jaǵdaı qalyptasqan.
"Būl – bílím júıesíníń írgetasyn shaıqaltatyn asa qauíptí qūbylys. Mūǵalímder oqushyǵa bílím berude emes, marapat jınauda bír-bírímen jarysa bastady", – dedí ol.
Deputat halyqaralyq tájírıbege de toqtalyp óttí. Kóptegen damyǵan elderde memlekettík marapattar zańmen qatań qorǵalatynyn, krıterıılerí naqty árí rásímí ashyq júrgízíletínín atap óttí. Al Qazaqstanda kez kelgen adam qoǵamdyq ūıym qūryp, ataq tarata alatyn jaǵdaı bar ekenín synǵa aldy.
Osyǵan baılanysty deputat Úkímetke bírqatar naqty ūsynys joldady:
- 2025 jylǵy mausymda qabyldanǵan zańnamalyq ózgerísterdíń tolyq árí tıímdí oryndaluyn qamtamasyz etu;
- Qoǵamdyq marapattardy zańsyz taratu faktílerí boıynsha ákímshílík jáne ózge de qūqyqtyq sharalardy júıelí qoldanu;
- Memlekettík jáne qoǵamdyq nagradalardyń bíryńǵaı tsıfrlyq tírkelímín engízu arqyly ashyqtyq pen baqylaudy kúsheıtu.