Olımpıada tapsyrmalary Sıngapurdyń ozyq matematıkalyq bílím beru baǵdarlamasyna negízdeldí, dep habarlaıdy aqshamnews.kz tílshísí.
Astananyń «Smart Technological School» mektebíníń oqushylary Sıngapurda ótken matematıkadan halyqaralyq olımpıadada joǵary nátıje kórsettí.
Sıngapur qalasynda 17-22 mausym aralyǵynda «StemCo Global Finals Maths 2026/SGFM 2026» halyqaralyq olımpıadasynyń fınaly óttí. Baıqauǵa álemníń ár túkpírínen ūlttyq onlaın íríkteu kezeńderíníń jeńímpazdary altyn, kúmís jáne qola júldegerlerí qatysty.
Astanalyq oqushylar halyqaralyq dodada úzdíkter qatarynan kóríndí. «Smart Technological School» mektebíníń 5-synyp oqushysy Álímjan Kópeev absolyuttí chempıon atanyp, I oryn jáne altyn medal ıelendí. Al mekteptíń taǵy bír oqushysy Álıhan Mūrat III orynǵa ıe bolyp, qola medalmen marapattaldy.
Halyqaralyq olımpıadaǵa qatysu arnaıy shaqyru arqyly júzege asyryldy. Fınalǵa álemníń túrlí elderínen ūlttyq onlaın íríkteu kezeńderínde joǵary nátıje kórsetken oqushylar joldama aldy.
Olımpıada tapsyrmalary Sıngapurdyń ozyq matematıkalyq bílím beru baǵdarlamasyna negízdeldí. Qatysushylardyń tek matematıkalyq formulalardy bíluí ǵana emes, kúrdelí kontekstík esepterdí taldauy, logıkalyq oılauy jáne alǵan bílímín praktıkalyq jaǵdaıda qoldana bílu qabíletí synaldy.
Aıta keterlígí, «Smart Technological School» mektebínen halyqaralyq fınalǵa qatysqan ekí oqushynyń ekeuí de júldelí oryndarǵa ıe boldy. Būl – oqushylardyń pándík daıyndyǵy men halyqaralyq deńgeıdegí bílím dodalaryna ázírlígíníń joǵary ekenín kórsetetín nátıje.