Búgin – psıhologtardyń kásibı merekesi. Bul kún adam janynyń saýlyǵyn saqtaýǵa, qoǵamdaǵy rýhanı turaqtylyqty nyǵaıtýǵa úles qosyp júrgen mamandardyń eńbegin baǵalaýǵa arnalǵan. Atalǵan sala ókilderimen qatar, áskerı ortada qyzmet etetin psıhologtardyń róli de erekshe. Olar jeke quramnyń moraldyq-psıhologıalyq ahýalyn qamtamasyz etip, qyzmettik mindetterdiń sapaly oryndalýyna yqpal etedi.
Ulttyq ulannyń «Ońtústik» óńirlik qolbasshylyǵynda qyzmet atqaratyn podpolkovnık Almıra Qurmanálıeva – osy baǵyttaǵy kásibı mamandardyń biri. Ol jıyrma jyldan astam ýaqyt boıy áskerı qyzmette júrip, psıhologıalyq qamtamasyz etý salasynda mol tájirıbe jınaqtaǵan ofıser.
Áskerdegi psıhologtyń qyzmeti jeke quramnyń moraldyq-psıhologıalyq turaqtylyǵyn saqtaýǵa, ujymdaǵy ózara senimdi nyǵaıtýǵa jáne áskerı qyzmetshilerdiń streske tózimdiligin arttyrýǵa baǵyttalǵan. Júıeli túrde júrgiziletin psıhologıalyq jumystar jaýyngerlik daıarlyqtyń deńgeıine jáne qyzmettik mindetterdiń tıimdi oryndalýyna tikeleı áser etedi.
Óz qyzmeti týraly Almıra Birlikqyzy:
"Bizdiń negizgi mindetimiz – áskerı qyzmetshilerdiń psıhologıalyq daıyndyǵyn arttyrý, streske tózimdiligin qalyptastyrý, qıyn jaǵdaıda durys sheshim qabyldaý qabiletin damytý. Jeke áńgimeler men toptyq trenıńter arqyly emosıonaldyq jaǵdaıdy baqylap, psıhologıalyq qoldaý kórsetemiz. Sonymen qatar, jaýyngerlik qyzmetten keıingi beıimdelý, ońaltý jumystary men otbasy máseleleri boıynsha keńes berý de qyzmetimizdiń mańyzdy bóligi. Áskerde tártip pen jaýapkershilik birinshi orynda, al Ulttyq ulanda qyzmet etý – men úshin úlken mártebe", – deıdi ol.
Almıra Qurmanálıeva áskerı qyzmet jolyn 22 jasynda bastaǵan. Alǵashynda 7552 áskerı bóliminde aýdarmashy bolyp eńbek etip, keıin Almaty quramasynyń basqarmasyna memlekettik tildi engizý jónindegi maman retinde aýystyryldy. Qyzmetin jalǵastyra júrip, Qazaq Memlekettik qyzdar pedagogıkalyq ınstıtýtynda psıhologıa mamandyǵy boıynsha ekinshi joǵary bilim aldy. Áskerı psıhologıa salasy endi qalyptasyp jatqan kezeńde ol jańa baǵyttaǵy qyzmetti úlken jaýapkershilikpen ıgerip, kásibı turǵyda qalyptasty.
Búginde podpolkovnık Almıra Qurmanálıeva óziniń laýazymdyq mindetterin adal atqaryp, jeke quramnyń psıhologıalyq turaqtylyǵyn qamtamasyz etýge turaqty úles qosyp keledi. Onyń qyzmet joly kásibılikke, jaýapkershilikke jáne áskerı boryshqa adaldyqqa negizdelgen.