Ekí el arasynda mádenıet kúnderín ótkízu bíryńǵaı mádenı-aqparattyq yntymaqtastyqty nyǵaıtuǵa, ekíjaqty qatynastardy damytuǵa yqpal etetíní sózsíz. Atalǵan ís-shara ekí el arasyndaǵy mádenı baılanystardy odan árí damytuǵa serpín beredí, dep habarlaıdy aqshamnews.kz.
Qazaqstan Respublıkasy Mádenıet jáne aqparat mınıstrlígíníń ūıymdastyruymen mádenı kúnder ayasynda bírqatar ís-sharalar ótedí.
18 sáuír kúní Erevan qalasynyń «Máskeu» kınoteatrynda saǵat 16:00-de Qazaqstan kınosynyń ashyluy rejısser Rústem Ábdírashovtyń qazaq handary turaly «Qazaq handyǵy. Altyn taq» atty tamasha tuyndysymen bastalady. Saǵat 19:00-de rejısser Farhat Shárípovtyń «Toqta, tún» fılmí kórermen nazaryna ūsynylady.
19 sáuír kúní atalǵan kınoteatrda saǵat 16:00-de rejısser Seríkbol Ótepbergenovtyń «Patrıottar uaqyty» fılmí jáne 19:00-de rejısser D. Ibragımovtyń «Búrkít» fılmí kórsetíledí.
Qazaqstan Respublıkasynyń Armenıya Respublıkasyndaǵy mádenı kúnderí ayasynda ótetín negízgí ís-shara – 19 sáuír kúní saǵat 19:00-de Aram Hachaturyan atyndaǵy kontsert zalynda josparlanǵan. Onda otandyq ónerpazdardyń qatysuymen Gala kontsert ótedí. Atalǵan ís-sharaǵa Qazaqstan Respublıkasynyń Mádenıet jáne aqparat mınıstrí Aıda Balaeva men Armenıyanyń bílím, ǵylym, mádenıet jáne sport mınıstrí Janna Andreasyan, jergílíktí zıyaly qauymdar, ǵalymdar, jazushylar, dıplomatıyalyq korpustyń, shyǵarmashylyq odaqtardyń, qazaq dıasporasynyń ókílderí qatysady.
Gala-kontsertte Qazaqstannyń halyq ártísí Roza Rymbaeva, Qazaqstannyń eńbek síńírgen qaıratkerlerí Aleksandr Belyakov, Áıgerím Beketaeva, «Daryn» memlekettík jastar syılyǵynyń laureattary Rasul Jarmaǵambetov, Asqar Mūqıyat jáne basqa da óner jūldyzdary tanymal estradalyq ánder men halyq kompozıtorlarynyń shyǵarmalaryn oryndaıdy.
Qazaqstan Respublıkasy Mádenıet jáne aqparat mınıstrlígí jáne Armenıya Respublıkasy Mádenıet mınıstrlígíníń bírígíp ūıymdastyruymen Qazaqstan Respublıkasyndaǵy Armenıya Respublıkasynyń mádenı kúnderí 2024 jyly qazan aıynda Astana qalasynda ótken bolatyn.