Áleýmettik jeliden fýtbol taqyrybyn "shemishkeshe shaǵyp", "Real Madrıd" klýbyna jankúıer bolyp otyrǵan ájeıdi kórgen bolarsyz. Onyń teńbil dop ónerine degen qyzyǵýshylyǵy kóptiń tańdanysyn týdyryp, jelide lezde kóptegen qaralym jınady. Aqshamnews.kz tilshisi aıaq doby dese "ishken asyn jerge qoıatyn" qyzylordalyq Shámshágúl apanyń áńgimesin surap bildi.
"Fýtbolǵa mahabbatymdy Ronaldý oıatty"
Shámshágúl Myrzalyqyzy Qyzylorda oblysy, Aral aýdanynda dúnıege kelgen. 65 jastaǵy zeınetker Jambyl tehnologıalyq ınstıtýtynda ekonomıs-býhgalter mamandyǵyn meńgergen. Búginde joldasy ekeýi úsh balany tárbıelep ósirip, bes nemere súıip otyr. Ol óziniń fýtbolǵa degen qyzyǵýshylyǵy 2004 jylǵy Afına Olımpıadasynan bastalǵanyn aıtty.
"Balalarym fýtboldy jaqsy kórip, jastaıynan áýes boldy. Solarmen birge anda-sanda kórip júrip, birtindep qyzyǵa bastadym. Al shyn qyzyǵýshylyǵym 2004 jylǵy Afıny olımpıadasynan bastaldy. Sol kezde Portýgalıa ulttyq quramasynyń oıynyn kóre otyryp, Krıshtıaný Ronaldýdyń oıyn sheberligine tánti boldym. Osydan keıin-aq fýtbolǵa shyn qyzyǵýshylyǵym artty", – deıdi Shámshágúl Myrzalyqyzy.
Shámshágúl apa qalaı "madrıdıst" boldy?
2009 jyly Krıshtıaný Ronaldý "Real Madrıdke" aýysqannan keıin, Shámshágúl apa da resmı túrde "madrıdıst" atanady. Dese de, apamyzdy portýgaldyq surmergen ǵana emes, ózge de fýtbolshylar oıynymen tánti etken.
"2009 jyly Krıshtıaný “Real Madrıdke” keldi, osydan keıin “Realdyń” jankúıeri bola bastadym. Realǵa qyzyqqan sebebim – álemniń fýtbol juldyzdary jınalǵan klýb ekenin bildim. Zıdan, Fıgý, Bekhem, Pepe syndy “juldyzdardy” bir toptan kóre aldym. Oıynshylardyń árqaısy maqtaýǵa óte laıyqty, biraq maǵan oıyn sheberligimen qosa, qarapaıymdylyǵy, sypaıylyǵymen Lýka Modrıch degen oıynshy qatty unaıdy", - deıdi ol.
Sondaı-aq, Shámshágúl apa 2017 jylǵy Ispanıa Sýperkýbogin erekshe atap ótti. Sebebi bul maýsymda "Real" óziniń basty qarsylasy "Barselonany" tize búktirgen edi.
"2017 jyly Ispanıa Sýperkýboginde “Real Madrıd” “Barselonany” birinshi machte 3:1 esebimen jeńgen edi. Qarymta oıynda 2:0 esebimen taǵy jeńiske jetedi. Krıshtıanýdyń alystan soqqan goly dóp tıgen bolatyn. Ol sát áli esimde. Bul meniń súıikti machterimniń biri", - deıdi apa.
"Qaırat" pen "Real" machinde kimge jankúıer boldy?
Shámshágúl Myrzalyqyzy qazaq fýtbolyn da qadaǵalap otyrady. Ol bıyl CHL-ǵa joldama alǵan almatylyq "Qaırattyń" jeńisine erekshe qýanǵanyn da jasyrmady. Al kúlli qazaq kóz tikken "Real" men "Qaırattyń" tarıhı machinde ol otandyq klýbqa jankúıer bolǵanyn aıtty.
"Árıne, “Qaırattyń” oıyndaryn kóremin, jankúıermin. Dastan Sátpaevty erekshe atar edim. Ol “Qaıratta” da, ulttyq quramada da ózin jaqsy kórsetip júrgen jas oıynshy. "Realǵa" qarsy machte álbette almatylyq klýbqa jankúıer boldym", - dep qosty ol.
"El-klassıkony kórý - armanym"
Shámshágúl apanyń jelidegi vıdeolaryn uly júktegen. Ol bul oqıǵanyń qalaı bolǵanyn aıtyp berdi.
"Túngi 2:30-darda fýtbol kórip otyrǵanmyn. Balam ony túsirip alyp, jelige salyp jiberipti. Men qarsylyq etkenimmen, keıin kóbi qyzyǵýshylyq tanytyp, túrli suraq qoıa bastady", – deıdi ol.
Shámshágúl Myrzalyqyzynyń armandary da fýtbolmen baılanysty:
"Santágo Bernabeý stadıonyna barýdy, Realdyń keremet oıynyn tamashalaýdy kim armandamaıdy? Eger múmkindik bolsa, El-Klassıka oıynyn kórgim keledi", – dep qosty ol.