Búgín Petropavl qalasynda Kozybayev University men Arızona unıversıtetíníń bírlesken bílím beru baǵdarlamalary boıynsha bílím alǵan alǵashqy túlekterge bírden ekí dıplom – qazaqstandyq jáne amerıkalyq joǵary oqu oryndarynyń dıplomdary tabystaldy, – dep habarlaıdy aqshamnews.kz tílshísí.
Saltanatty rásím joǵary bílím salasyndaǵy halyqaralyq yntymaqtastyqty damytudaǵy mańyzdy kezeń boldy.
Joǵary bílím turaly dıplomdar, sondaı-aq oqu ozattary men unıversıtettíń qoǵamdyq ómíríne belsendí qatysqan studentterge alǵys hattardy QR Ǵylym jáne joǵary bílím mınıstrí Sayasat Nūrbek, Soltústík Qazaqstan oblysynyń ákímí Ǵauez Nūrmūhambetov, AQSh-tyń Qazaqstan Respublıkasyndaǵy Tótenshe jáne Ókílettí Elshísí Djulı Stafft jáne Arızona unıversıtetíníń prezıdentí Suresh Garımella tabys ettí.
M.Qozybaev atyndaǵy Soltústík Qazaqstan unıversıtetí men Arızona unıversıtetí arasyndaǵy seríktestík Qazaqstandaǵy joǵary bílímdí ınternatsıonaldandyrudyń eń tabysty úlgíleríníń bíríne aınaldy. Joba Memleket basshysy Qasym-Jomart Toqaevtyń jetekshí sheteldík unıversıtetterdí elge tartu jáne otandyq joǵary bílímníń básekege qabílettílígín arttyru jóníndegí bastamasy ayasynda júzege asyrylyp keledí.
«Alǵashqy sheteldík joǵary oqu orny retínde Qazaqstanda ashylǵan Arızona unıversıtetíníń tūńǵysh túlekteríne búgín dıplom tabystap jatyrmyz. Būl unıversıtet 2022 jyly Memleket basshysynyń bastamasyn alǵashqylardyń bírí bolyp qoldap, Qazaqstanda óz fılıalyn ashqan edí. Búgínde būl sheshímníń tolyqtaı ózín aqtaǵanyn senímmen aıta alamyz. Arızona unıversıtetí Petropavlda alǵash ret mıkrokampus ashqan sheteldík unıversıtet qana emes. Ol akademıyalyq sapaǵa, ózara senímge jáne bolashaq mamandardy dayarlaudaǵy ortaq jauapkershílíkke negízdelgen halyqaralyq joǵary bílím berudíń jańa modelíníń bastamashysyna aınaldy», – dedí Ǵylym jáne joǵary bílím mınıstrí Sayasat Nūrbek.
Arızona unıversıtetíníń prezıdentí Suresh Garımella ekí unıversıtet arasyndaǵy seríktestík ekí eldíń bílím beru dástúrlerí men akademıyalyq áleuetín tabysty ūshtastyrǵan jarqyn úlgí bolǵanyn atap óttí.
«Tórt jyl būryn Arızona unıversıtetí men Kozybayev University elderímízdí jaqyndastyratyn, tíldík kedergílerdí eńseretín jáne ártúrlí bílím beru dástúrlerín toǵystyratyn jobany júzege asyru úshín kúsh bíríktíru turaly sheshím qabyldady. Bízdíń seríktestígímízdíń tarıhy 2022 jyly qos dıplom baǵdarlamasynyń íske qosyluynan bastaldy. Ol kezde baǵdarlamaǵa nebárí 43 student qabyldanǵan bolatyn. Qazír būl baǵdarlama boıynsha 368 student bílím alyp jatyr. Al búgín alǵashqy túlekter oquyn ayaqtap jatyr. Kezínde būl jastar qalyptasqan sheńberden shyǵuǵa batyldyq pen kóregendík tanytqan unıversıtetke sením artty. Búgínde bízdíń túlekterímíz jahandyq álemde kóshbasshy boluǵa tolyq daıyn», – dedí Suresh Garımella.
Qazírgí tańda bírlesken bílím beru baǵdarlamalary boıynsha 1 200-den astam student bílím alyp jatyr, onyń íshínde 359 student – qos dıplom baǵdarlamalarynyń bílím alushylary. Unıversıtetter 6 qos dıplom baǵdarlamasy men 12 halyqaralyq bílím beru baǵdarlamasyn júzege asyrady. Sonymen qatar genomıka, agrotehnologıyalar, su resurstary jáne kúkírttí polımerleu baǵyttary boıynsha bírlesken ǵylymı zertteuler júrgízíp keledí.
Qos dıplom baǵdarlamalary boıynsha alǵashqy túlekterdíń oquyn ayaqtauy Qazaqstanda júzege asyrylyp jatqan halyqaralyq akademıyalyq yntymaqtastyq modelíníń tıímdílígín aıqyn dáleldeıdí. Būl tájírıbe álemdík deńgeıde básekege qabílettí mamandar dayarlauǵa jańa múmkíndíkter ashady.