Industrıya jáne ınfraqūrylymdyq damu vıtse-mınıstrí Berík Qamalıev aqyly joldarda tarıf óspeıdí dedí.
Nūr-Sūltanda Industrıya jáne ınfraqūrylymdyq damu vıtse-mınıstrí Berík Qamalıev pen «Aq jol» partıyasynyń tóraǵasy Azat Peruashevtíń kezdesuímen ótken jıynda avtojol jáne kólík salalarynyń damuy máselelerí talqyǵa salyndy, dep habarlaıdy Almaty-akshamy.kz QR Industrıya jáne ınfraqūrylymdyq damu mınıstrlígíne síltemelep.
Būǵan deıín «Aq joldyń» deputattary tólem júıesíníń engízíluíne narazy ekendíkterín aıtqan júrgízushíler men kásípkerlerge qoldau kórsetken bolatyn.
Vıtse-mınıstr Berík Qamalıev deputattardyń eskertuleríne jauap beríp, kólík jáne avtomobıl joldary salasyndaǵy qazírgí ahualdan habardar ettí. Sondaı-aq, ol aqyly joldarmen júru tarıfteríníń bes esege qymbattaıtyny jaıly deputattarmen jarıyalanǵan aqparat shyndyqqa janaspaıdy dep sendírdí. Tarıfter 2013 jyldan, yaǵnı «Nūr-Sūltan-Shchuchınsk» avtojolyna tólem júıesí engízílgennen berí, ózgeríssíz qalǵan: jeńíl kólík úshín - 1 shaqyrymyna 1 teńge, júk kólígí úshín - 1 shaqyrymyna 5-ten 25 teńgege deıín, yaǵnı júk kótergíshtígíne baılanysty. Būdan bólek, vıtse-mınıstr bízdíń elde tarıfter basqa memlekettermen salystyrǵanda tómen ekenín basa aıtty.
2020 jyly barlyq aqyly 4 uchaskeden 5,7 mlrd. teńge túsím túsken. 2021 jyldyń 1 mausymyndaǵy jaǵdaı boıynsha, aqyly uchaskelerden 2,3 mlrd teńge jınalǵan. Túsken qarajattyń barlyǵy joldardy kútíp ūstauǵa baǵyttalady.
Aıta keteıík, tólem alu júıesí tek zamanauı qauípsízdík talaptary men kólík qūraldarynyń jaıly jaǵdaılaryna jauap beretín uchaskelerde engízílude.
Esteríńízge sala keteıík, «Nūrly jol» memlekettík baǵdarlamasyna sáıkes, aǵymdaǵy jyly bírínshí sanattaǵy avtomobıl joldaryna aqy alu júıesín kezeń-kezeńmen engízu kózdelgen.
Kezdesu barysynda, sondaı-aq, mınıstrlíkke avtojol salasyn damytu josparlaryna qyzyǵushylyq tanytqan aımaqtyq deputattardan sūraqtar túsíp jatty.
Partıya deputattary mınıstrlíkke kerí baılanys pen qoǵamnyń píkírleríne jedel jauap bergení úshín alǵystaryn bíldírdí. Taraptar avtojol jáne kólík salalaryn damytu boıynsha bírlesken jūmysty jalǵastyruǵa uaǵdalasty.