Qazaqstan Aýyl sharýashylyǵy mınıstrligi áleýmettik jeliler men keıbir BAQ-ta taraǵan "Aqbóken etin jeý qaýipti, ol arqyly juqpaly aýrý juǵýy múmkin" degen aqparatqa qatysty pikir bildirdi, - dep habarlaıdy aqshamnews.kz tilshisi.
Mınıstrlik málimetinshe, janýarlardyń asa qaýipti aýrýlaryn (usaq kúıis qaıyratyn janýarlardyń obasy, aýsyl, brýselez, pasterellez, sibir jarasy jáne taǵy basqa) boldyrmaý maqsatynda aqbókenderdiń búkil popýlásıasyna Ulttyq veterınarıa referenttik ortalyǵy turaqty túrde epızootıalyq monıtorıń júrgizedi.
Sonymen qatar, aqbókendermen ortaq jaıylymdar men sýattarda aýyl sharýashylyǵy janýarlaryna da veterınarıalyq qyzmet turaqty túrde monıtorıńtik zertteýler júrgizip otyrady.
Aıta keteıik, aqbókenderdi soıý jáne bıologıalyq qaldyqtardy zalalsyzdandyrý boıynsha tıisti normatıvter qabyldanǵan.
"Qazir aqbókenderdiń sanyn retteý jumystaryna 6 oblystaǵy 24 soıý pýnkti jumyldyrylǵan. Barlyq soıý obektileri veterınarıalyq-sanıtarıalyq talaptarǵa saı (mal soıýǵa arnalǵan arnaıy bólmeler, tońazytqysh kameralar, ushalardy ilýge arnalǵan quraldar, sýmen jabdyqtaý jáne t.b.). Ushalar soıý oryndaryna jetkizilgen soń, olar veterınarıalyq dárigerlerdiń baqylaýynan ótip, veterınarıalyq-sanıtarıalyq saraptamadan ótkiziledi", - delingen habarlamada.
Bul rette, aqbóken etine mindetti zertteýler júrgiziledi, olar: ushanyń, ishki aǵzalardyń jáne basynyń organoleptıkalyq qaraýy; barlyq qoljetimdi lımfa túıinderin jaryp, ishki aǵzalardy tilip tekserý; qaınatý synamasy; fınozǵa (sıstıserkoz) zertteý; jalpy radıasıalyq fondy anyqtaý.
Ushanyń veterınarıalyq talaptarǵa sáıkestigi anyqtalǵan jaǵdaıda, et ári qaraı bólshektelip, óńdeledi, al qaldyqtar zalalsyzdandyrylady.
Aqbókennen alynǵan ónim veterınarıalyq dárigerler bergen anyqtamamen súıemeldenedi. Bul qujat ónimniń shyqqan jerin, qaýipsizdigin jáne sapasyn rastaıdy.
Ótkiziletin janýarlardan alynatyn ónimder veterınarıalyq-sanıtarıalyq qaýipsizdik talaptaryna saı bolýy qajet. Qazaqstan Respýblıkasynyń "Veterınarıa týraly" Zańynyń 22-babyna sáıkes, janýarlardan alynatyn ónimder men shıkizatty veterınarıalyq-sanıtarıalyq saraptamasyz ótkizýge tyıym salynady.
"Sonymen qatar, ishki saýda nysandarynda veterınarıalyq ınspektorlar kúndelikti baqylaý júrgizedi. Olar: veterınarıalyq anyqtamanyń jáne soıý ornynyń tańbasynyń bolýyn; ónimdi tasymaldaý kezinde temperatýralyq rejımniń saqtalýyn; zerthanalyq baqylaý nátıjelerin tekseredi", - dedi mınıstrliktegiler.
Osyǵan baılanysty, Veterınarıalyq baqylaý jáne qadaǵalaý komıteti tutynýshylarǵa aqbóken etin arnaıy belgilengen oryndardan jáne veterınarıalyq ilespe qujattar bolǵan jaǵdaıda ǵana, tamaqtaný jáne veterınarıalyq-sanıtarıalyq qaýipsizdik talaptaryna sáıkes satyp alýdy usynady.