Qazaq elín shetelge tanytqan tūńǵysh ánshí
Almatyda qazaqtyń áıgílí ánshísí Ámíre Qashaubaevtyń zıraty jańartyldy, dep habarlaıdy Almaty-akshamy.kz QazAqparatqa sílteme jasap.
Ámíre Qashaubaevtyń zıratyn jańartu turaly bastama kótergen Shyǵys Qazaqstan oblystyq Ámíre Qashaubaev atyndaǵy memlekettík fılarmonıyanyń dırektory Aıbek Bekbosynov.
«Bízdíń fılarmonıyamyz Ámíre Qashaubaev atynda bolǵandyqtan ánshí atamyzdyń zıratynyń qazírgí jaǵdaıyn kórgím keldí. Osy maqsatpen Almatyǵa arnaıy ūshyp keldím. Ámíreníń zıraty Almatydaǵy ortalyq zıratta ornalasqan eken. Zıratyn kóríp, ony jóndep, jańartu qajet ekeníne kózím jettí. Sodan ózím tanıtyn Semeıdegí kásípker jígítterge habarlasyp, zıratty jóndeu turaly óz oıymdy aıttym. Olar qoldau bíldíríp, osylaısha Ámíre atamyzdyń zıraty jańartyldy. Árıne aıta keteıík, Ámíre – ol tek Semeı ǵana emes, ol bar qazaqtyń Ámíresí», - dedí oblystyq fılarmonıyanyń dırektory.
Áıgílí ánshíníń jańartylǵan zıratynyń basyna Ūlyqbek Esdáulet, Tūrsyn Jūrtbaı, Roza Rymbaeva Seken Tūrysbekov sekíldí belgílí ádebıet, óner, mádenıet qaıratkerlerí jınalyp, qūran baǵyshtap, áıgílí ánshíníń aruaǵyna taǵzym ettí.
Aıta keteıík, Almatynyń ortalyq zıratyna Álíbı Jangeldın, Isa Baızaqov, Dına Nūrpeıísova, Mūhtar Áuezov, Ámíre Qashaubaev, Ermūhan Bekmahanov, Ahmet Jūbanov, Qalıbek Quanyshbaev, Kúlásh Baıseıítova, Qanysh Sátbaev, Sháken Aımanov, Mūqan Tólebaev, Qapan Musın syndy belgílí tūlǵalary jerlengen.
Eske salsaq, Ámíre Qashaubaev shet elde óner kórsetíp qazaq elín tanytqan tūńǵysh ánshí boldy. Germanıyanyń Maındaǵy Frankfurt qalasyndaǵy kontsertke qatysyp, qazaqtyń halyq ánderín taǵy da álemge pash ettí. Ámíre Qashaubaevtyń ánderí dúnıe júzí mádenıetíníń írí ókílderí Romen Rollan, Anrı Barbyus taǵy basqalar tarapynan joǵary baǵa alǵan. A.V. Zataevıch dara talanttyń «Balqadısha», «Dudaraı», «Bes qarager», «Kók kóbelek» taǵy da basqa ánderín jazyp alǵan.
Onyń ánshílík ónerín, ónerdíń parqyn tereń túsínetín mamandar A.V.Lunacharskıı, G.Lyubımovter jáne qazaq ádebıetí men óneríníń kórnektí ókílderí M.Áuezov, S.Seıfullın, I.Baızaqov, Á.Marǵūlan, J.Elebekov, A.Jūbanov, Q.Jandarbekovter joǵary baǵalaǵan.
Ámíre Qashaubaev jónínde bírneshe zertteuler, kórkem shyǵarmalar jaryq kórgen.