Qazaqstannyń 19 mıllıonynshy turǵyny Janıa Azamatqyzy Jetisý jerinde dúnıege keldi.
Almaty oblysynyń ákimi Amandyq Batalov Qazaqstannyń 19 mıllıonynshy turǵyny Janıa Azamatqyzynyń ata-anasyna quttyqtaý hatyn joldady, dep habarlaıdy Almaty-akshamy.kz.
Oblys ákiminiń baspasóz qyzmetiniń málimeti boıynsha, Janıa Azamatqyzy İle aýdanynyń turǵyndary Nurǵalıevtar otbasynda dúnıege kelgen.
«Qazaqstannyń 19 mıllıonynshy turǵyny Janıa Azamatqyzynyń Jetisý jerinde, sizderdiń otbasylaryńyzda ómirge kelýimen shyn júrekten quttyqtaımyn!
Bul – el Táýelsizdiginiń 30 jyldyǵyndaǵy aıtýly oqıǵa, bir otbasynyń ǵana emes, barsha jurtshylyqtyń qýanyshy. Osy aqjoltaı súıinshi habardy Prezıdentimiz Qasym-Jomart Kemeluly Toqaev jarıalaǵan sátte ony, ásirese, jetisýlyqtar zor rızashylyqpen qabyldady.
Osydan nebary tórt jyl buryn bizdiń Almaty oblysynda memleketimizdiń 18 mıllıonynshy turǵyny Múslıma Samatqyzy dúnıe esigin ashqan edi. Mine, az ǵana ýaqytta elimizdegi demografıalyq ósimniń nátıjesinde 19 mıllıonynshy mejege jetip otyr. Bul - Qazaqstannyń turaqtylyǵy men órkendeýiniń, halyqtyń bolashaqqa degen zor seniminiń aıqyn kórinisi.
Barsha jetisýlyqtardyń atynan kishkentaı sábıdiń aman-saý er jetip, eldiń abyroıly azamaty bolyp ósýine tilektestik bildiremin! Otbasylaryńyzǵa baq-dáýlet, urpaqtaryńyzǵa jarqyn ómir tileımin. El ishiniń tynyshtyǵy men berekesi nyǵaıyp, halqymyzdyń yrysy arta bersin!» - delingen quttyqtaý hatta.
Jalpy 1 maýsymdaǵy málimet boıynsha, Almaty oblysyndaǵy turǵyndar sany 2 088 822 adamǵa jetti.