Dornbırn qalasynda (Aýstrıa) Eýropa, Kavkaz jáne Ortalyq Azıa elderiniń jetekshi sáýletshileri, ýrbanısteri, memlekettik ınstıtýttary men zertteý ortalyqtarynyń ókilderin biriktirgen SHARE Architecture Awards 2025 halyqaralyq sáýlet festıvali ótti.
Usynǵan ýrbanıstik jobalary úshin SHARE Awards syılyǵymen «Almatybasjospar» ǵylymı-zertteý ınstıtýty marapattaldy.
Festıvál SHARE Architects Society qoldaýymen ótkizilip, arhıtektýralyq dıalogty damytý men óńirdegi úzdik jobalardy ilgeriletýge baǵyttalǵan kásibı platforma bolyp tabylady.
2025 jyly forým tarıhyndaǵy eń aýqymdy baǵdarlama usyndy. Barlyǵy 20 elden 114 joba fınaldyq kezeńge iriktelip, «İske asyrylǵan ǵımarattar», «Interer» jáne «Bolashaq jobalary» sanattary boıynsha qazylar alqasyna usynyldy.
Bıyl Qazaqstan forýmnyń negizgi qatysýshylarynyń birine aınaldy. «Almatybasjospar» ǴZI bas dırektory Asqat Sádýov festıváldiń resmı baǵdarlamasyna shaqyryldy.
Baıandama barysynda ol Almatyny damytýdyń strategıalyq baǵyttaryn tanystyrdy. Atap aıtqanda: qalanyń polısentrlik modeli, qalalyq ortanyń sapasyn arttyrý jáne qoǵamdyq keńistikterdi damytý baǵdarlamalary, qala qurylysyna ǵylymı-taldamalyq tásildi engizý, sondaı-aq qalalyq ınfraqurylymnyń turaqtylyǵyna qatysty halyqaralyq standarttardy engizýdi usyndy.
İs-shara qorytyndysy boıynsha Asqat Sádýov «Almatybasjospar» ǴZI ujymynyń zamanaýı ýrbanıstik saıasatty qalyptastyrýǵa jáne halyqaralyq arhıtektýralyq dıalogty damytýǵa qosqan úlesin moıyndaǵan SHARE Awards syılyǵymen marapattaldy.
«Bul marapat Almatydaǵy ýrbanıstıkalyq ózgeristerge degen halyqaralyq qyzyǵýshylyqtyń artyp kele jatqanyn aıqyn dáleldep, Qazaqstannyń kásibı sáýletshiler qaýymdastyǵygdaǵy bedelin kúsheıte tústi», – dedi A. Sádýov.