Almatynyń turıstík ekspozıtsıyasy 2026 jylǵy 4-7 mausym aralyǵynda Koreya Respublıkasynyń Seul qalasynda ótken Seoul International Travel Fair (SITF) 2026 halyqaralyq turıstík kórmesínde halyqaralyq marapatqa ıe boldy, – dep habarlaıdy aqshamnews.kz tílshísí.
Būl turaly Almaty qalasynyń Turızm basqarmasynyń ókílderí aıtty.
Kórmege álemníń 40 elínen kelgen 423 ūıym qatysyp, ózderíníń turıstík múmkíndígín 518 stendte tanystyrdy.
Almatynyń ekspozıtsıyasy kelushílerge qalanyń tabıǵı baǵyttaryn, mádenı kóríktí jerlerín, gastronomıyalyq erekshelígín jáne turıstík ınfraqūrylymyn tanystyrdy. Sondaı-aq ónerpazdardyń óner kórsetuí, ūlttyq kıímder men qazaqtyń ūlttyq taǵamdarynan ūıymdastyrylǵan dám tatu sharasy qonaqtardyń erekshe qyzyǵushylyǵyn tudyrdy.
Kórme qorytyndysy boıynsha Almaty stendí ekspozıtsıyanyń mazmūndyq tūrǵydan úzdík bezendíríluí men tanystyrylymy úshín beríletín The Best Booth Content Award halyqaralyq syılyǵymen marapattaldy.
SITF 2026 ūıymdastyru komıtetíníń ókílí Lı Son Ho kelushílerdíń Almaty ekspozıtsıyasyna joǵary qyzyǵushylyq tanytqanyn atap óttí.
«Almaty bízdíń kórmege jyl saıyn qatysady. Sońǵy jyldary Koreyada Qazaqstanǵa turıstík baǵyt retínde qyzyǵushylyq aıtarlyqtaı artyp keledí. Almaty stendí joǵary deńgeıde daıyndaluymen ereksheleníp, kórmeníń eń kóp kelushí jınaǵan árí belsendí alańdarynyń bíríne aınaldy», – dedí ol.
Ońtústík Koreya Almaty úshín eń qarqyndy damyp kele jatqan turıstík naryqtardyń bírí bolyp qala beredí. 2025 jyly qalaǵa būl elden 23 myńnan astam turıst kelgen.
Turızm basqarmasy ókílderíníń málímetínshe, halyqaralyq kórmege qatysu Almatynyń turıstík áleuetín sheteldík audıtorıyaǵa keńínen tanystyruǵa jáne Shyǵys Azıyadaǵy mańyzdy naryqtardyń bírínde qalanyń tanymaldylyǵyn arttyruǵa múmkíndík berdí.