Megapolıs ákimi Baqytjan Saǵyntaev «Almaty» telearnasyndaǵy Akimat LIVE baǵdarlamasynyń tikeleı efırinde osylaı dedi.
Qala basshysy almatylyqtardyń suraqtaryna jaýap bere kelip, aǵymdaǵy jyly 100 shaqyrymnan asatyn jańa joldardy salýdyń josparlanǵanyn aıtty, dep habarlaıdy Almaty-akshamy.kz
Belgili bolǵandaı, kóptegen jyldar boıy ınjenerlik jáne áleýmettik ınfraqurylymsyz qalǵan Almaty oblysynyń eldi mekenderdiń qosylýyna baılanysty qala aýmaǵy birneshe ret ulǵaıdy. Joldardy, sýmen jabdyqtaý jáne sýdan burý jelilerin, balabaqshalardy, mektepter men emhanalardy salýǵa barlyq kúsh jumyldyrylǵanyn atap ótti Baqytjan Saǵyntaev. Bul másele Almaty ákiminiń turaqty baqylaýynda.
2021 jyly Alataý, Túrksib jáne Naýryzbaı aýdandaryndaǵy segiz shaǵyn aýdanynda jańa joldar salý josparlanýda. Bular – Ójet, Shańyraq-5, Samǵaý, Nurshashqan, Quramys, Álmerek, Qaırat, Alǵabas shaǵynaýdandary. Osy shaǵynaýdandardaǵy 415 kóshede uzyndyǵy 108 km jańa joldar salynatyn bolady.
Sonymen birge Dýman shaǵynaýdanyndaǵy uzyndyǵy 30,5 km bolatyn 53 kóshede joldardy kúrdeli jóndeý jumystary júrip jatyr. Onyń ishinde uzyndyǵy 5,6 km bolatyn 11 kóshede jumys aıaqtaldy. Qalǵan 42 kósheni aıaqtaý aǵymdaǵy jyldyń qyrkúıegine deıin josparlanǵan.
Budan ózge, uzyndyǵy 227,5 km bolatyn 225 kóshede jol jabynyn jóndeý josparlanýda. Qazirgi kezde 66 kóshede, onyń ishinde 12 magıstraldy jáne 54 jergilikti mańyzy bar kóshelerde, jumys júrip jatyr.