Memlekettík quyrshaq teatry eresek kórermenderíne arnap «Men kímmín?» spektaklíníń premerasyn ūsyndy. Aıtar oıy tereń erekshe qoıylym adam janynyń qūpıya álemínen syr shertedí.
Qoǵamdaǵy ruhanı jalǵyzdyq, adamdyq kelbettí joǵaltu, óz-ózímen arpalysu sekíldí íshkí qaıshylyqtardy, adam janynyń kúızelíske ūshyrauyn qauzaıtyn spektakl mazmūny quyrshaq óneríníń múmkíndíkterí arqyly sáttí bayandaldy deuge bolady. Basty keıípkerdíń íshkí jan aıqaıy, qoǵammen úılesím taba almauy jáne ózín-ózí tanuǵa ūmtylysy kórermenín tereń oıǵa jeteleıdí.
Iá, adamnyń ruhanı daǵdarysqa ūshyrauyn, onyń ózín kóptíń íshínen taba almaı alasūrǵan ahualyn kórkem túrde jetkíze bílgen «Men kímmín?» spektaklíníń rejısserí – álemdík quyrshaq teatry ónerínde ózíndík qoltańbasy qalyptasqan, Gúrjístan elínen arnaıy shaqyrtylǵan suretker Nıkoloz Sabashvılı.
"Men kímmín?» – qazírgí qoǵamdaǵy ózektí taqyryptardy kóteretín, kórermen sūranysyna saı spektakl dep oılaımyn. Bíz būl tuyndy arqyly adamdyq bolmystyń máníne qaıta úńíludí úndeımíz. Quyrshaq teatry – tek balalarǵa arnalǵan óner emes, ol kez kelgen kúrdelí ıdeyany názík árí tereń jetkíze alatyn sahnalyq tíl. Premera kórermenge erekshe áser, tereń oı jáne ruhanı tolǵanys syılady dep senemíz", – deıdí Memlekettík quyrshaq teatrynyń dırektory Almat Amangeldí.
Spektakl sońynda quyrshaq-keıípkerlerdí sheber oınata bílgen artısterge Almaty qalasynyń ákímdígí atynan yqylas gúlí tabystaldy. Al Nıkoloz Sabashvılıdíń ıyǵyna teatr ūjymy qazaqy jolmen shapan japty.
"Bírínshíden, 90 jyldyq belesten ótken Quyrshaq teatrynyń kúní keshe ǵana «akademıyalyq» mártebesín ıelengen quanyshymen qūttyqtaımyn. Jalpy, búgíngídeı tereń oıly, joǵary deńgeıdegí jūmystar osylaı akademıyalyq jūdyryq bolyp jūmylǵan sátte, yaǵnı bíríńíz quyrshaqtyń ayaq-qolyn, ekínshíńíz basyn, kózín, úshínshíńíz oıyn «sóıletíp» jatqan kezde shyǵady ǵoı. Bír spektakldíń óne boıynda qanshama áríptesímníń kásíbı sheberlígí, jankeshtí eńbegí, mańdaı terí jatyr deseńízshí! Premera qūtty bolsyn!" – dedí M.Áuezov atyndaǵy Qazaq ūlttyq drama teatrynyń dırektory Erkín Juasbek.
