№7 Qalalyq klınıkalyq auruhananyń ınfraqūrylymyn jańǵyrtu bastaldy
Óńírlík kommunıkatsıyalar qyzmetínde Nazıra Toǵyzbaeva audannyń áleumettík ınfraqūrylymyn damytuǵa qatysty 10 aıdyń qorytyndysyn jarıyalady, - dep habarlaıdy Aqshamnews.kz.
Ákímníń aıtuynsha, medıtsına men áleumettík qoldau qaladaǵy eń jaqsy damyp kele jatqan audandaǵy basym baǵyttyń bírí bolyp qalǵan.
Qazír audanda 13 medıtsınalyq ūıym jūmys ísteıdí, onda shamamen 5 myń maman qyzmet atqarady. Densaulyq saqtau mekemeleríne shamamen 190 myń tūrǵyn tírkelgen. Osyǵan baılanysty audanda jańa emhanalar men alǵashqy medıtsınalyq-sanıtarlyq kómek kórsetu ortalyqtary salynyp jatyr.
«Qūramys» shaǵynaudanynda qūny 8,9 mlrd teńge bolatyn úlken emhana salynady. Emhana bír auysymda 500 adamǵa eseptelgen, qūrylys jūmysy 2026 jyldyń mausymynda ayaqtalady. Sondaı-aq, «Shūǵyla» shaǵynaudanynda osyndaı taǵy bír emhana salyna bastady. Onyń qūrylysy bıylǵy qarashada bastalyp, keler jyldyń qyrkúıegínde bítpek.
«Aqjar» men «Tastybūlaq» shaǵynaudanynda da auysymyna 200 adam qabyldaıtyn ekí ambulatorıyanyń jobasy memlekettík saraptamadan ótíp jatyr. Qūny shamamen 1,2 mlrd jáne 1,5 mlrd teńge bolyp qalady.
«Qalalyq auruhanalardy jańǵyrtuǵa erekshe kóńíl bólíngen. №7 qalalyq klınıkalyq auruhanada ınfraqūrylymdy jańartu jūmysy bastaldy: toǵyz operatsıyalyq zaldy kóshíríp, konstruktsıyalardy kúsheıtíp, jeke bloktardy bólshekteu bastaldy. №1 qalalyq klınıkalyq auruhanany qaıta jańartudy 2026 jyldyń nauryzyna josparlap otyrmyz», - deıdí Nazıra Toǵyzbaeva.
Nauryzbaı audanynda 3 dene shynyqtyru-sauyqtyru keshení de salynady. Ekeuí «Shūǵyla» shaǵynaudanynda, bíreuí «Aqjar» shaǵynaudanynda ornalasady. Qazír osylarǵa jobalyq-smetalyq qūjattama ázírleníp jatyr.
Nazıra Toǵyzbaeva áleumettík jáne medıtsınalyq ınfraqūrylymdy damytu tūrǵyndardyń ómír sapasyn arttyrudyń negízgí sharty ekenín atap ótíp, basty nysandardy jańǵyrtu josparly túrde jalǵasatynyn jetkízdí.