Almaty qalasynyń polıortalyqty damýy megapolıstegi kóptegen máseleni sheshýge múmkindik beredi. Bul týraly Bas jospardy túzetý jobasy boıynsha ótken qoǵamdyq talqylaý barysynda «Almatybasjospar» ǵylymı-zertteý ınstıtýtynyń basshysy Asqat Sádýov aıtty.
Almatyny 2040 jylǵa deıin damytýǵa arnalǵan Bas jospar jobasyna sáıkes, qalada «Tarıhı ortalyq», «Shyǵys qaqpasy», «Batys», «Ońtústik-batys» jáne «Soltústik» syndy bes iri polıortalyq qurý kózdelgen.
Spıkerdiń aıtýynsha, bul polıortalyqtarda qala turǵyndary saýda jasaý, bos ýaqytty tıimdi ótkizý jáne t.b. ortalyqtaǵydaı qyzmet ala alady. Sonymen qatar, osy polıortalyqtardyń ózara tyǵyz baılanysta bolýy mańyzdy.
«Búkilqalalyq birtutas júıege aınaldyrý úshin bes polıortalyqty biriktirý kerek», – dedi Asqat Sádýov.
Almatyny polıortalyqty damytý strategıasy aıasynda metro jelisin áýejaı men Alataý qalasyna deıin keńeıtý josparlanyp otyr.
Sondaı-aq, spıker LRT jelisin damytý jospary jaıly aıtty. Aldyn ala jospar boıynsha jeńil relsti tramvaı jelisi bolashaqtaǵy «Barlyq» metro beketinen Tóle bı kóshesi arqyly «Almaty-II» temirjol vokzalyna deıin jetedi. Odan ári LRT jelisi Raıymbek dańǵyly boıymen «Shyǵys qaqpasy» baǵytyna jalǵasady. Keıin LRT jelisi ońtústikke qaraı tartylady.
Eske sala keteıik, Almatyda 2040 jylǵa deıingi qala damýyn aıqyndaıtyn Bas jospardy túzetý jobasy boıynsha qoǵamdyq talqylaýlar ótip jatyr.