«Almaty Business – 2025» óńirlik kásipkerlikti damytý baǵdarlamasy aıasynda Almatyda sendvıch-panelder shyǵaratyn jańa óndiris qurý jónindegi ınvestısıalyq joba qolǵa alyndy, dep habarlaıdy aqshamnews.kz
Jobany «Almaty» ÁKK» AQ-nyń enshiles uıymy — «Almaty Finance» JSHS qarjylandyrdy. «East Star Com.kz» JSHS-ne 2025 jyly jeltoqsanda 7 jyl merzimge jyldyq 6% jeńildetilgen mólsherlememen 480 mln teńge kóleminde qarjy berildi. Jobanyń jalpy ınvestısıa kólemi 1,5 mlrd teńge, onyń ishinde 1 mlrd teńge kompanıanyń óziniń qarjysy. Óndiristik keshen Almatynyń Indýstrıalyq aımaǵynda («Almaty» ÁKK» enshiles uıymy) ornalastyrylady.
Joba aıasynda bir aýysymda 3 000 sharshy metrge deıin ónim shyǵaratyn zamanaýı tehnologıalyq jeli satyp alynyp, iske qosylady. Sendvıch-panelder órt jáne ekologıalyq qaýipsizdiktiń joǵary talaptaryna saı keletin, óz óndirisindegi mıneraldy jylý oqshaýlaǵysh materıaldardy paıdalana otyryp daıyndalady, mektepter, aýrýhanalar men turǵyn úılerdi qosqanda, komersıalyq jáne áleýmettik qurylys salasynda qoldanylady. Jobanyń júzege asyrylýy Almatynyń jáne Qazaqstannyń basqa óńirleriniń qurylys naryǵyn otandyq qurylys materıaldarymen qamtamasyz etip, ımporttyń úlesin qysqartýǵa múmkindik beredi.
«Almaty Indýstrıalyq aımaǵyndaǵy jobalardy qoldaý — qarjylandyrýdyń basym baǵyttarynyń biri. Qalanyń ónerkásibin damytýmen qosa, bul joba 33 jańa jumys ornyn quryp, 7 jyl ishinde búdjetke shamamen 490 mln teńge salyq túsimin qamtamasyz etedi», — dedi «Almaty Finance» JSHS basqarma tóraǵasy Erlan Egemberdıev.