Almatydaǵy Boraldaı jáne Rahat-Mádenıet shaǵyn aýdandarynda bıyl mamyr aıynda 50 km jańa joldyń qurylysy bastalady
Alataý aýdanynyń turǵyndarymen kezdesý barysynda Almaty ákimi Erbolat Dosaev jol-kólik ınfraqurylymyn damytý baǵytynda atqarylyp jatqan jumystar týraly aıtty.
Qala basshysynyń aıtýynsha, 2024 jyly aýdannyń 66 kóshesi, jalpy uzyndyǵy 41,7 km jol ortasha jóndeýden ótken, al bıylǵy jyly 18 shaǵyn aýdanda 81 km jol jóndeý josparlanǵan.
Sondaı-aq, ótken jyly aǵymdaǵy jóndeý aıasynda 30 myń sharshy metr jol tósemi qalpyna keltirilip, 12 km tehnıkalyq trotýar salynǵan. 2025 jyly taǵy 30 myń sharshy metr jol jáne 9 km trotýar jóndeý josparlanyp otyr.
«Ótken jyldyń qarashasynda biz Móńke bı men Saın kósheleriniń qıylysyndaǵy jolaıyryqty aıaqtadyq, bul qalanyń negizgi magıstral kóshelerindegi kólik júktemesin 20%-ǵa azaıtýǵa múmkindik berdi. Bıylǵy jyldyń qarashasyna deıin Saın kóshesin uzartý jumysyn aıaqtaýdy josparlap otyrmyz. Jańa shaǵyn aýdandardyń jol ınfraqurylymyn damytýǵa erekshe kóńil bólinýde. Bıyl mamyr aıynda Boraldaı jáne Rahat-Mádenıet shaǵyn aýdandarynda jalpy uzyndyǵy 50,6 km jańa jol qurylysy bastalady, aıaqtalý merzimi — 2026 jyldyń qarashasy», – dedi Erbolat Dosaev.
Almaty ákimi sondaı-aq, 2024 jyly qoǵamdyq kólik qyzmetiniń sapasyn arttyrý maqsatynda aýdan boıynsha avtobýs sany 1 221-den 1 467-ge deıin artqanyn aıtty. Bul 11 jańa marshrýt ashýǵa, 30 marshrýtqa qosymsha avtobýstar qosýǵa jáne 12 marshrýtty jańartýǵa múmkindik berdi.