28 gvardıyashy-panfılovshylar atyndaǵy sayabaqta merzímdí áskerı qyzmetke shaqyrylǵandardy saltanatty túrde shyǵaryp salu rásímí bolyp óttí, – dep habarlaıdy aqshamnews.kz tílshísí.
Almatydan attanǵan shamamen 90 adam desanttyq-shabuyldau áskerínde míndetín óteıdí endí.
Jas sarbazdardy qoldauǵa Almaty garnızonynyń áskerı qyzmetshílerí, kursanttar, áskerı-patrıottyq ūıymnyń tárbıelenushílerí, Qaruly Kúshtíń ardagerlerí men sarbazdardyń tuǵan-tuystary keldí. Qūrmettí qonaqtardyń qatarynda jergílíktí atqarushy organdardyń ókílderí, Qaruly Kúshterdíń ardagerlerí, general Ivan Panfılovtyń nemeresí Alua Baıkadamova men Almatydaǵy Soldat analary komıtetíníń ókílí Tatyana Tropına da boldy.
Almatydaǵy Qorǵanys ísterí departamentíníń bastyǵy, polkovnık Jaqsylyq Aıtbaev áskerge shaqyrylǵandarǵa aq jol tílep, sóz sóıledí. Ol áskerı qyzmet ár jígíttíń ómíríndegí jauapty kezeń ekenín atap óttí.
Qala tūrǵyny Ásel Erǵazynyń úı-íshímen ūldaryn áskerge shyǵaryp salǵany eń áserlí sáttíń bírí boldy. Bír úıden bír mezette ekí azamat — ūly men jıení áskerge attandy osy joly. Ekí jas sarbaz da «tehnık-baǵdarlamashy» mamandyǵyn meńgergen, ekeuí de sportpen de úzbeı aınalysypty.
Jıení, áskerge shaqyrylǵan Ámírhan Ábenov Nomad MMA boıynsha sport sheberlígíne kandıdat, 2025 jylǵy Azıya chempıony, 2026 jylǵy Azıya bírínshílígíníń júldegerí, Qazaqstannyń úsh dúrkín chempıony bolyp shyqty.
— Ūldaryma áskerı míndetín abyroımen atqaryp, áskerı ómírdíń ūńǵyl-shūńǵyly men qyr-syryn úıreníp qaıtuyna tílektespín, — dedí Ásel Erǵazy.
Aıta keteıík, osy kóktemgí nauqanda Almatydan 2000-nan astam azamatty ásker qataryna shaqyru josparlanyp otyr.
Áskerge shaqyrylǵandar Qorǵanys mınıstrlígíníń, Memlekettík kúzet qyzmetíníń, Ūlttyq ūlannyń, ŪQK Shekara qyzmetí men Tótenshe jaǵdaılar mınıstrlígíníń bólímsheleríne jíberíledí. Qyzmetten keıín sarbazdar ŪBT tapsyrmaı-aq joǵary oqu ornyna oquǵa túse alady, eń úzdík nátıje kórsetkenderí keıín tegín joǵary bílím alu múmkíndígíne ıe bolady.