Bıyl Almatydaǵy Saýda jáne tutynýshylardyń quqyqtaryn qorǵaý departamenti azamattardan túsken 15,1 myńnan astam ótinishti qarap, tutynýshylarǵa qaıtarylǵan qarajattyń jalpy somasy 721,7 mln teńgeden asyp tústi. Bul týraly Almaty qalasynyń Óńirlik komýnıkasıalar qyzmeti alańynda ótken jyldyń qorytyndysyna arnalǵan brıfıńte Departament basshysynyń orynbasary Nurlan Ábdıev habarlady.
Spıkerdiń aıtýynsha, Departament jumysynyń negizgi baǵytynyń biri – tutynýshylardyń quqyqtaryn qorǵaý, saýda salasyndaǵy memlekettik baqylaý, sondaı-aq halyqty keńes berip, quqyqtyq aǵartý bolyp qala beredi.
2025 jyldyń qorytyndysy boıynsha Almaty qalasynda shamamen 300 ákimshilik jaza qoldanylǵan. Eń jıi kezdesetin zań buzýshylyq – taýardy aıyrbastaýdan nemese qaıtarýdan bas tartý, tutynýshylardyń shaǵymyna ýaqytyly jaýap bermeý, sondaı-aq áleýmettik mańyzy bar azyq-túlik taýarlaryna belgilengen saýda ústemesin asyryp jiberý eken.
Ótinishterdiń negizgi bóligi bólshek jáne elektrondyq saýda salasyna tıesili. Turǵyn úı-kommýnaldyq qyzmetter máseleleri boıynsha Departament qaladaǵy jergilikti atqarýshy organdarmen birlesip júıeli jumys júrgizip jatyr. Bilim berý, medısınalyq qyzmetter men kópshilik tamaqtanatyn salalardan kóbine taýarlar men qyzmetterdiń sapasy týraly tutynýshylardy jańylystyrýǵa baılanysty ótinish túsedi.
Áleýmettik mańyzy bar azyq-túlik taýarlarynyń baǵa qalyptastyrýyna baqylaý júrgizýge erekshe kóńil bólinip otyr.
«2025 jyly qalada deldaldyqty tergep-tekserý jónindegi komısıanyń 24 otyrysy ótkizildi. Nátıjesinde 523 quqyqbuzýshylyq anyqtalyp, joıyldy, 485 ákimshilik hattama toltyryldy. Bular halyq úshin ónimniń túpkilikti qunyn tómendetýge múmkindik berdi», – dep atap ótti Nurlan Ábdıev.
Sonymen qatar Departament qaladaǵy qoǵamdyq uıymdarmen belsendi túrde yntymaqtastyq ornata otyryp, buqaralyq aqparat quraldary men áleýmettik jelilerde tutynýshylardyń quqyqtary men kásipkerlerdiń mindetin jan-jaqty túsindiretin jumystardy da úzbeı júrgizip keledi.
Spıkerdiń aıtýynsha, osy jumystardyń nátıjesinen keıin almatylyqtardyń quqyqtyq saýattylyǵy artyp, jaýapsyz kásipkerlik qyzmetke baqylaýdy odan ári kúsheıtý túsý qajet degen toqtamǵa kelgen.