XX jazǵy Azıya oıyndary 4 qazanǵa deıín jalǵasady, dep habarlaıdy aqshamnews.kz tílshísí.
Japonıyada ótíp jatqan XX jazǵy Azıya oıyndarynda almatylyq sportshylar ūlttyq qūrama sapynda júlde aludy jalǵastyryp jatyr. Kezektí kúmís medaldardy Krıstına Morozova, Mılad Karımı jáne Tatyana Tokarnıtskaya jeńíp aldy. Būl turaly Almaty qalasy sport basqarmasynyń ókílderí aıtty.
Jeńíl atletıkadan Krıstına Morozova jartylaı marafon qashyqtyǵyndaǵy sporttyq júríste 1:35:25 nátıjesín kórsetíp, ekínshí oryn ıelendí. Onyń kúmís júldesí Qazaqstannyń áıelder arasyndaǵy sporttyq júrís tarıhynda erekshe nátıje boldy — Morozova osy dıstsıplınada Azıya oıyndarynyń kúmís medalín jeńíp alǵan alǵashqy qazaqstandyq sportshy atandy.
Sporttyq gımnastıkadan Mılad Karımı erler arasyndaǵy erkín jattyǵular fınalynda 14,600 ūpaı jınap, ekínshí orynǵa ıe boldy. Qazaqstan Azıya oıyndarynda būl baǵdarlama boıynsha 32 jyldan keıín alǵash ret kúmís medal jeńíp aldy. Būǵan deıín dál osyndaı júldení 1994 jyly Sergeı Fedorchenko ıelengen.
Taǵy bír kúmís júldení Tatyana Tokarnıtskaya jeńíp aldy. Baıdarkamen eskek esuden áıelder arasyndaǵy 500 metrlík qossaıysta ol Olga Shmelyovamen bírge 1:48,140 nátıjesímen márege ekínshí bolyp jettí.
Būl júldeler almatylyq sportshylardyń Azıya oıyndaryndaǵy sáttí ónerín jalǵastyrdy. Būǵan deıín Almaty ókílderí qazírgí bessaıystan komandalyq jarysta jáne karateden qola medal jeńíp alǵan edí.
XX jazǵy Azıya oıyndary 4 qazanǵa deıín jalǵasady. Alda Qazaqstan qūramasy sapyndaǵy almatylyq sportshylar sporttyń ózge túrlerínen de synǵa túsedí.