Qazaqstan qolónershílerí kúníne arnalǵan baspasóz konferentsıyasy ayasynda Almaty qalasynyń Óńírlík kommunıkatsıyalar qyzmetí alańynda suretshí-keramıst, KClay Pottery Studio sheberhanasynyń negízín qalaushy Sergeı Katuntsev qolóner óneríníń damuy, dástúrlí tehnologıyalardyń mańyzy men qysh óneríníń qazírgí mádenıettegí orny turaly oı bólístí, – dep habarlaıdy aqshamnews.kz tílshísí.
Onyń aıtuynsha, qolóner qazír eskí mádenıettíń jūrnaǵy bolyp qana qoımaı, osy zamanǵy kreatıvtí ındustrıyamen de qatarlasyp damı bastaǵan. Sheberdíń ózí on jyldan berí keramıkamen aınalysyp, sazdyń tabıǵı qasıetí men ejelden kele jatqan kúıdíru tehnologıyasyn zerttep júr eken.
«Bíregeı tuyndy jasap qana qoımaı, bílímímízdí jas ūrpaqqa jetkízíp, shyǵarmashylyqqa shabyttandyryp, dástúr men qazírgí óner arasyndaǵy tabıǵı baılanysty saqtap qalu bízdíń maqsat», – deıdí Sergeı Katuntsev.
Suretshí Ortalyq Azıyanyń kórkemdík mūrasy – kóne tańbalarǵa, petroglıfter men tarıhı belgílerge súıeníp, olardy qazírgí ónerdíń kózímen jańasha paıymdauǵa tyrysqan. Shıkízatty íríkteuden bastap daıyn būıymdy kúıdíruge deıíngí óndírístí tolyq meńgeríp shyqqanyn aıtyp otyr.
Sheberdíń píkírínshe, Almaty qazír Ortalyq Azıyadaǵy qolónerdíń jetekshí ortalyǵyna aınalyp barady. Qalanyń halyqaralyq deńgeıde moıyndaluy qazaqstandyq qolóner men ónerdí shetelge kóbírek tanytuǵa sep bolypty.
«Sheberlerdí qoldap, olardyń tájírıbesín jas ūrpaqqa jetkízu – mádenı mūrany saqtap, qalamyzdyń shyǵarmashylyq kelbetín qalyptastyratyn jaqsy bastama dep esepteımín», – dep túıíndedí sózín Sergeı Katuntsev.