1986 jylǵy Jeltoqsan oqıǵasynyń qaharmandaryn eske alý jáne Táýelsizdik rýhyn jas urpaq boıyna sińirý maqsatynda Almatynyń Alataý aýdanyndaǵy mektepteriniń oqýshylary arasynda “Máńgi oıanǵan namys” atty óner baıqaýy uıymdastyrylǵan bolatyn. Uıymdastyrýshylar – “Jeltoqsan aqıqaty” respýblıkalyq qoǵamdyq birlestigi, “Nurly shýaq” qoǵamdyq qory, “Parasatty jastar” jáne “Halyqaralyq “Qazaq tili” qoǵamy” qoǵamdyq birlestikteri.
”Baıqaýdyń maqsaty – Jeltoqsan qaharmandarynyń erligin nasıhattaý, óner arqyly ulttyq qundylyqtar men Otanǵa degen súıispenshilikti arttyrý, talantty oqýshylardy anyqtaý jáne qoldaý. Baıqaýǵa Alataý aýdanyndaǵy 20 mektepten 100-den asa oqýshy qatysyp, irikteý kezeńde 30 jetkinshektiń baǵy jandy. Jeńimpazdardyń eshqaısysyn bólip-jarmaı, bárine baǵaly syılyqtar tabystadyq», – deıdi “Jeltoqsan aqıqaty” respýblıkalyq qoǵamdyq birlestiginiń tóraǵasy Bolat Qurymbaev.
Baıqaýdyń “Kórkem sóz” janrynda balalar Táýelsizdik jáne patrıottyq taqyrybynda shyǵarma jazdy. “Vokal” nomınasıasynda jandy daýyspen patrıottyq ánder shyrqady. “Aqyndyq ónerde” jetkinshekter avtorlyq óleńin oryndady. Al “Beıneleý óneri” janrynda Jeltoqsan rýhyn, batyrlar erligin, beıbit ómirdi beıneleıtin sýretterin usyndy.
”Meniń qyzym Sezim Qanatbek N205 mekteptiń 5 “e” synybynda oqıdy. Ol búgingi baıqaýda “Beıneleý óneri” nomınasıasynyń jeńimpazy atandy. Sýretinde Báıterekti beınelepti. Kókpeńbek aspan da maǵan ádemi áser syılady. Jap-jasyl shóptiń ústinde dastarhan jaıyp, kóńildi otyrǵan otbasynyń beınesi de júregimdi terbedi. Qyzymnyń osyndaı egemen elde, baqytty otbasynda ómir súrip jatqanyna myń táýba aıtamyn”, - deıdi almatylyq ata-ana Jadyra Qarakózeeva.
Baıqaýdyń alǵashqy irikteý kezeńi onlaın formatta uıymdastyrylǵan bolatyn. Al biz ekinshi sheshýshi kezeńine, ıaǵnı megapolıstegi Oqýshylardyń ınovasıalyq shyǵarmashylyq ortalyǵynda ótken, onlaın-saıystan úzdik dep tanylǵan balalardyń basy qosylǵan gala-konsertine qatystyq. Alataýlyq ónerli oqýshylar konsert qoıdy. Mereıi ústem bolǵan jas dostar marapattaldy. Barlyq qatysýshyǵa sertıfıkat tabystaldy.