№7 QKA dárígerlerí bíregeı operatsıya jasap, ūıqy bezí auruynyń auyr asqynuy – pankreonekrozy (ólgen) bar 45 jastaǵy nauqastyń ómírín saqtap qaldy, – dep habarlaıdy aqshamnews.kz tílshísí.
Áıel būǵan deıín ūıqy bezíníń qatty qabynuy – jítí destruktıvtí pankreatıtpen auyrǵan. Uaqyt óte kele ūıqy bezíníń jalǵan jylauyǵy – sūıyqtyqqa toly quys paıda bolǵan. Jaǵdaıy aǵzada paıda bolǵan íríńnen nasharlap, dene qyzuy kóterílgen, auruy asqynyp, álsízdík kúıge túsken. Quystyń kólemí shamamen 15 santımetrge deıín ūlǵaıǵan. Būl óte auyr jáne qauíptí jaǵdaı.
№7 QKA-nyń jetekshí mamandarynyń, bílíktí hırurgtar men endoskopısterdíń qatysuymen konsılıum ótkízíldí. Oǵan auruhana dırektory, professor Manas Ramazanov, dırektordyń medıtsınalyq bólím (hırurgıya) jóníndegí orynbasary Qambar Baıjígítov, №2 hırurgıya bólímshesíníń meńgerushísí, professor Mūsa Sahıpov, endoskopıya bólímshesíníń meńgerushísí Ayan Baıjanov, №1 hırurgıya bólímshesíníń meńgerushísí Talǵat Baıtūrǵanov pen hırurg Sáken Báıímbetov qatysty. Konsılıumda patsıenttí emdeu tásílí men aldaǵy operatsıya jospary talqylandy.
Dárígerlerdíń aldynda kúrdelí tańdau tūrdy: dástúrlí kesíndílermen ashyq operatsıya jasau nemese zamanauı qūrylǵylardy paıdalanyp az ınvazıvtí ádístí qoldanu.
Patsıenttíń klınıkalyq ahualy, KT derekterín jáne jalǵan jylauyqtyń ınfektsıyalyq belgílerín eskere otyryp, az ınvazıvtí aralasudy, yaǵnı endoskopıyalyq tsıstogastrostomıyany qoldanu turaly sheshím qabyldandy.
Operatsıya kezínde arnaıy ıílgísh qūral – endoskop paıdalanyldy. Ol íshke auyz arqyly engízíldí. Jabdyqtardyń baqylauymen olar asqazan men jylauyq quysynyń arasynda shaǵyn «arna» jasady. Būl arna arqyly íshí quys jíńíshke qūbyr (stent) salyndy. Sonyń arqasynda jylauyqtyń sūıyqtyǵy asqazanǵa qauípsíz aǵyp, keıín aǵzadan tabıǵı jolmen shyǵyp kettí.
Mūndaı ádistiń basty artyqshylyǵy – terí jamylǵysynda tílík jasalmauynda. Būl asqynu qaupín edáuír tómendetedí, auyrsynudy azaıtady jáne patsıenttíń tezírek ońalyp qalpyna keluíne múmkíndík beredí. Alaıda, būl jaǵdaıda operatsıya erekshe dáldíktí talap ettí: jalǵan jylauyq kólemí jaǵynan óte úlken bolyp ósken, jūqpaly jáne aǵzanyń mańyzdy músheleríne jaqyn ornalasqan.
«Operatsıyadan keıín nauqastyń jaǵdaıy tez jaqsara bastady: dene qyzuy tústí, auyrsynu belgílerí azaıdy, jalpy kóńíl-kúıí tūraqtandy. Kóp ūzamaı jaqsy kórsetkíshterímen úıíne shyǵaryldy», – dedí Talǵat Mūhıtūly.
Būl jaǵdaıdyń auruhana úshín mańyzdy jetístík, dárígerler úshín úlken tájírıbe bolǵanyn erekshe atap ótu kerek. Óıtkení mūndaı operatsıya mūnda alǵash ret jasaldy. Būl dárígerlerdíń kásíbı sheberlígín jáne qaladaǵy zamanauı medıtsınalyq tehnologıyalardyń damuyn kórsetedí.