Almaty qalalyq qoǵamdyq densaýlyq saqtaý basqarmasynyń málimetinshe, ortalyq qalalyq klınıkalyq aýrýhanada 40 jastaǵy naýqastyń ót qabynan 5 499 tas alynǵan. Bul – otandyq medısına tarıhynda tirkelgen eń sırek jaǵdaılardyń biri, dep habarlaıdy aqshamnews.kz
Naýqas aýrýhanaǵa jedel kórsetkishter boıynsha jetkizilgen. Onyń negizgi shaǵymdary – oń jaq qabyrǵa astyndaǵy aýyrsyný, álsizdik, júrek aınýy men jalpy mazasyzdyq bolǵan. Últradybystyq zertteý barysynda ót qabynda óte kóp kólemde konkrementter (tastar) anyqtalyp, dárigerler laparoskopıalyq holesıstektomıa (ót qabyn alyp tastaý) jasaýǵa sheshim qabyldaǵan.
Alaıda operasıa nátıjesi tájirıbeli hırýrgtardyń ózin tańǵaldyrdy.
– Biz kóp tas bolatynyn boljadyq, biraq 5 500-ge jýyq bolady dep eshkim oılaǵan joq. 20 jyldyq tájirıbemde mundaı jaǵdaımen alǵash ret kezdestim, – dedi hırýrgıa jónindegi bas dárigerdiń orynbasary Farabı Stamqulov.
Operasıany júrgizgen hırýrg İlıas Saǵıev te áserin jasyrmady:
– Ót qaby ishi tasqa tolyp turǵan farshtalǵan burysh sekildi boldy. Mundaı jaǵdaı ómirde bir ret qana kezdesetin shyǵar, – dedi ol.
Ota sátti ótti. Hırýrgtar men anestezıologtardyń úılesimdi jumysynyń arqasynda naýqas tez esin jıyp, kóp uzamaı aýrýhanadan shyǵaryldy.
Dárigerlerdiń aıtýynsha, ót-tas aýrýy kóbine esh belgi bermeı, jasyryn túrde ótedi. Alaıda aýrý asqynǵan jaǵdaıda onkologıalyq dertke, uıqybezdiń jansyzdanýyna (pankreonekroz), nemese tipti ót-tas jylankózi (svısh) sekildi aýyr asqynýlarǵa ákelýi múmkin.