Almaty qalasynyń ákímí Darhan Satybaldy Túrkıya Respublıkasynyń elshísí Mūstafa Kapudjumen kezdesu ótkízdí, – dep habarlaıdy aqshamnews.kz tílshísí.
Almaty qalasynyń ákímí Darhan Satybaldy Túrkıya Respublıkasynyń Tótenshe jáne Ókílettí Elshísí Mūstafa Kapudjumen kezdestí. Taraptar tarıhı jaqyndyq pen mádenı ortaqtyqqa negízdelgen ekíjaqty qarym-qatynastyń joǵary deńgeıín atap óttí. Sondaı-aq 34 jylda Qazaqstan men Túrkıya arasyndaǵy yntymaqtastyq strategıyalyq áríptestík deńgeıíne kóterílgení aıtyldy.
Kelíssózder barysynda eldegí eń írí megapolıs retínde Almatynyń rólí erekshe ekení atap ótíldí. Qala jalpy íshkí ónímníń shamamen 23%-yn qalyptastyryp, tíkeleı sheteldík ınvestıtsıyalardyń 40%-ǵa juyǵyn tartady. Túrkıya Almatynyń negízgí seríktesteríníń bírí bolyp qala beredí: 2025 jyldyń qorytyndysy boıynsha tauar aınalymy 750 mln AQSh dollarynan asty. Qalada túrík kapıtaly bar 2 500-den astam kompanıya tírkelgen. Túrkıya ınvestorlarynyń qalalyq ınfraqūrylym men jyljymaıtyn múlík salasyn damytuǵa qosqan úlesí de aıtyldy.
Taraptar yntymaqtastyqtyń jańa baǵyttaryn talqylady. Basym baǵyttar qatarynda zamanauı ískerlík jáne qarjylyq klasterlerdí damytu, halyqaralyq kórmeler ótkízuge arnalǵan ınfraqūrylym qūru, tau turızmí men logıstıka damytu jáne tsıfrlyq sauda platformalaryn qalyptastyru bar. Sonymen qatar densaulyq saqtau men bílím beru salalaryndaǵy bírlesken jobalardy júzege asyru jaıyna erekshe nazar audaryldy.
Kezdesude turıstík jáne mádenı-gumanıtarlyq baılanysty damytuǵa da basymdyq beríldí. 2025 jyly Almatyǵa Túrkıyadan 37 myń turıst kelgení oń dınamıkany kórsetedí. Almaty men Túrkıyanyń írí qalalary arasyndaǵy tíkeleı áue reısteríníń boluy turıstík jáne ískerlík baılanysty odan árí artuyna yqpal etedí. Taraptar būl kezdesu ózara tıímdí yntymaqtastyqty nyǵaıtuǵa qosymsha serpín beretíníne sením bíldírdí.