Ūlttyq quyrshaq óneríníń temírqazyǵy sanalatyn Almaty Memlekettík quyrshaq teatry Frantsıya memleketínde ótetín zamanauı teatr óneríníń eń auqymdy sharalarynyń bírí «Off Avignon» halyqaralyq festıvalíne qatysuǵa joldama aldy, dep habarlaıdy aqshamnews.kz tílshísí.
Tarıhy 1947 jyldan bastau alatyn álemdegí eń bedeldí árí kórnektí mádenı shara Frantsıya memleketí Avınon qalasynda jyl saıyn ótkízílíp keledí. Búgínde festıval túrlí memlekettíń túkpír-túkpírínen kelgen shyǵarmashylyq ūjymdardy bír arnaǵa toǵystyryp, mádenı tájírıbe almasudyń mańyzdy ortalyǵyna aınalyp otyr.
Teatr atalmysh festıval ayasynda Uılyam Shekspırdíń klassıkalyq tuyndysy «Romeo men Djuletta» spektaklín 16-26 mausym kúnderí saǵat 20:40-ta «LaScierie» teatry sahnasynda ūsynady. Spektakl jastardyń tańdau erkíndígí, patrıarhaldy júıeníń qysymy, ūrpaqtar arasyndaǵy túsíníspeushílík jáne álemdegí ūltaralyq taptyq, mádenı kedergíler sıyaqty ózektí máselelerdí quyrshaq óneríníń zamanauı úrdísí arqyly kórsetedí. Atalmysh spektakl rejısserí talantty Dına Jūmabaıdyń erekshe shyǵarmashylyq qoltańbasy spektaklge emotsıonaldy tereńdík pen astarly sımvoldardy qosyp, vızualdyq jáne muzykalyq sheshímder arqyly kórermenge erekshe áser qaldyrady. Spektaklde kórkem quyrshaq plastıkasy men akterlík oıyn úılesímdí ūshtasyp, poetıkalyq árí áserlí sahnalyq atmosfera qūrylady.
«Off Avignon» festıvalíne qatysu Almaty quyrshaq teatrynyń tarıhyndaǵy aıtuly beles, ūlttyq quyrshaq ónerín álemdík deńgeıde tanystyruǵa taptyrmas múmkíndík. Bíz klassıkalyq shyǵarma Uılyam Shekspırdíń «Romeo men Djuletta» tragedıyasyn quyrshaq tílímen jańasha túrlendíríp ūsyndyq. Spektaklde akterlík sheberlík pen kórkem quyrshaq plastıkasy úılesím tauyp, kórermenge jańa estetıkalyq áser syılaıdy. Spektakl ótken ǵasyrdaǵy otbasy tarıhyn ǵana emes, sonymen qatar búgíngí tańdaǵy ózektí máselelerdí qamtı kele, máńgílík óshpes taqyryptardy tereńínen qozǵaıdy. Būl sapar bízdíń ūjym úshín úlken jauapkershílík árí shabyt kózí», - deıdí Memlekettík quyrshaq teatrynyń dırektory Almat Amangeldí.
«Romeo men Djuletta» spektaklí 2024 jyly Kanada memleketí Ottava qalasynda ótken Í-shí Halyqaralyq «Ottava» quyrshaq teatrlar festıvalíne tūńǵysh ret qatysyp, «Gran-Prı» júldesíne, 2022 jyly Bolgarıyanyń Varna qalasynda ótken «Altyn delfın» halyqaralyq festıvalínde «Gran-prı», sondaı-aq, «Eń úzdík er adam rólí» jáne «Eń úzdík debyut» nomınatsıyalaryn, 2021 jyly Qaraǵandyda ótken «Syn - shyn bolsyn» respublıkalyq teatr festıvalínde «Gran-prı» júldesín ıelengen!
«Off Avignon» festıvalíne qatysu teatr ūjymy úshín zor mártebe ǵana emes, sonymen qatar qazaq quyrshaq ónerí men mádenı bolmysyn álem jūrtshylyǵyna tanytatyn bíregeı múmkíndík. Būl - ūlttyq ónerdíń ózíndík boyauy men tereń ruhanı mánín halyqaralyq deńgeıde pash etíp, qazaq mádenıetíníń kópqyrlylyǵyn kórsetuge jol ashatyn, shyǵarmashylyq ízdeníster men ruhanı úndestíkter toǵysatyn asa mańyzdy alań.
Europa sahnasynda el atyn asqaqtatatyn áríptesterímízge sáttílík tíleımíz!