Almatydaǵy Respublıka alańy auqymdy jańǵyrtu jūmystarynan keıín qaıta ashyldy. Qalanyń basty qoǵamdyq keńístíkteríníń bírí sanalatyn aumaq tolyq abattandyrylyp, tūrǵyndar men qala qonaqtarynyń jaıly demalysyna laıyq zamanauı kelbetke ıe boldy, – dep habarlaıdy aqshamnews.kz tílshísí.
Joba ayasynda jayau júrgínshíler joly jańartylyp, ınjenerlík jelíler men jaryqtandyru júıesí tolyqtaı auystyryldy. Sonymen qatar subūrqaqtar, balalar oıyn alańdary, demalys oryndary, amfıteatrlar velojoldar salyndy.
Alańdy jańartu barysynda kógaldandyru jūmystaryna erekshe kóńíl bólíngen. Aumaqqa 233 írí aǵash, 63 myńnan astam būta jáne 17,7 myń kópjyldyq ósímdík otyrǵyzylyp, avtomatty suaru júıesí íske qosylǵan. Keshkí uaqytta aumaq sáulettík jaryqtandyrumen bezendírílíp, tūrǵyndardyń qauípsízdígí úshín jańa shamdar ornatylǵan.
Almaty qalasy Qoǵamdyq keńístíkterdí damytu basqarmasynyń basshysy Batyrhan Súleımenovtíń aıtuynsha, Respublıka alańyndaǵy qūrylys úsh aıda tolyq ayaqtalǵan.
– Qūrylys jūmystary tolyq ayaqtalyp, nysan paıdalanuǵa beríldí. Qazírgí tańda Sátbaev kóshesín keshendí abattandyru jobasy júzege asyrylyp jatyr. Sol jobanyń qūramyna Respublıka alańy da engízílgen bolatyn. Mūnda keshendí kógaldandyru júrgízílíp, júzdegen aǵash pen ondaǵan myń būta otyrǵyzyldy. Injenerlík ınfraqūrylym jańartylyp, tūrǵyndar úshín jaıly árí zamanauı qoǵamdyq keńístík qalyptastyryldy, – dedí basqarma basshysy.
Qala basshysynyń tapsyrmasyna sáıkes júzege asyrylǵan būl joba qoǵamdyq keńístíkterlí damtyu, tūrǵyndardyń ómír súru sapasyn arttyruǵa baǵyttalǵan. Nátıjesínde Respublıka alańy qala tūrǵyndary men qonaqtary úshín jaıly, qauípsíz árí zamanauı demalys keńístígíne aınalyp otyr.