2026 jylǵy shíldege deıín Almatynyń Belsendí ūzaq ómír súru ortalyǵynda 10,8 myńnan astam zeınetker tírkelgen, – dep habarlaıdy aqshamnews.kz tílshísí.
Óńírlík kommunıkatsıyalar qyzmetínde ortalyqtyń dırektory Sáule Beketaeva osy ortalyqtyń jūmysy, baǵdarlamasy men egde jastaǵylarǵa arnalǵan jańa múmkíndígí turaly tolyǵyraq aıtyp berdí.
Ortalyqtyń málímetínshe, 2022 jyly tírkelgen qatysushylar sany 833 adamdy qūrasa, bıylǵy shíldege qaraı būl kórsetkísh 10 806 adamǵa jetken. Bólímshelerge kún saıyn orta eseppen 700-800 adam keledí. Ortalyq qazír tórt alańda: ortalyq bólímshede, Medeu men Bostandyq audanynda, sondaı-aq Baluan Sholaq atyndaǵy Sport saraıynda jūmys ísteıdí.
«Belsendí ūzaq ómír súrudíń basty míndetí – adamdarǵa bos uaqytyn qala ómíríne belsene aralasa otyryp ótkízuge kómektesu. Bízdíń jūmystyń maqsaty da osy», - deıdí basshysy.
Ortalyq medıtsınalyq-sauyqtyru, psıhologıyalyq, bílím beru, mádenı, dene shynyqtyru, eńbek terapıyasy, qūqyqtyq jáne áleumettík baǵyt boıynsha 70-ten astam qyzmet túrín ūsynady. Onyń qatarynda emdík dene shynyqtyru, ıoga, aıkune, tsıgun, skandınavıyalyq júrís, bı, hor, qolóner, kompyuterlík sauattylyq, shet tílín úırenu, sondaı-aq psıholog pen dárígerdíń keńesí bar. Almatyda tírkelgen zeınetkerlerge tegín qyzmet kórsetedí.
Aıtarlyqtaı ósím kórsetken baǵyttyń bírí – «Kúmís unıversıtetter» bílím beru baǵdarlamasy. Eldíń bes jetekshí joǵary oqu ornymen bírlesíp, zeınetkerler shet tílín, tsıfrlyq sauattylyqty, jasandy ıntellektíní, mobılografıya men kıberqauípsízdíktí meńgeredí. Baǵdarlamaǵa qatysushylar sany byltyrǵy 651 adamnan bıyl 3 885 adamǵa deıín jetíptí.
Bílím beru baǵdarlamasynan bólek, Ortalyq «Agrokraudsorsıng» pen «Almaty ájelerí» jobalaryn, este saqtau qabíletín damytu, tsıfrlyq jáne qarjylyq sauattylyq, elektrondy memlekettík qyzmettí paıdalanu sabaqtaryn, shyǵarmashylyq baǵyt pen salauatty ómír saltyn ūstanuǵa arnalǵan baǵdarlamalardy qosa damytyp kele jatyr.
Jeke baǵyttyń bírí – «kúmís eríktílík». Ekí jyldan berí belsendí zeınetkerler qolóner úıírmelerín, gıtara tartu sabaǵy men vokaldyq kezdesudí ózderí ūıymdastyryp júr. On bes eríktí qyzyǵushylyq klubyn júrgízedí, olardyń jūmysyna myńnan astam adam tartylǵan. Osylaısha, Ortalyq qatysushylary tek qyzmet alushylar ǵana emes, sonymen qatar tálímgerler, ūıymdastyrushylar men eríktíer retínde de kózge túsíp júr.
Taǵy bír mańyzdy joba – «Almaty ájelerí» baǵdarlamasy. Onyń qatysushylary jetí elde Qazaqstannyń atynan óner kórsetíp, túrlí kórsetílím men halyqaralyq festıvalderge qatysty. Olar sheteldík audıtorıyaǵa Qazaqstannyń mádenıetín, ūlttyq kıímín, dástúrín tanystyrdy.
Ortalyqtyń shyǵarmashylyq baǵyty da qalypty sabaq ayasynan shyǵyp otyr. Qatysushylardyń jūmysy qalalyq, respublıkalyq jáne halyqaralyq kórmege qoıyldy. Bı ūjymdary men aspaptyq ansamblder qūryldy, al ekí teatr qala teatrlarynyń sahnsynda qoıylym ūsynyp keledí. Olardyń qatarynda «Aljır», «Soǵystyń sońǵy ání», «Áje» men basqa da spektakl bar.
«Belsendí ómír súru úshín densaulyqqa qamqorlyq jasau ǵana emes, qarym-qatynas, bílím alu, shyǵarmashylyqpen aınalysyp, qoǵamǵa qajet ekeníńdí sezíngen dūrys. Aǵa buynnyń belsendí ómír súruíne jaǵdaı jasaı otyryp, bíz búgín adamdarǵa qoldau kórsetíp qana qoımaı, ūrpaq arasyndaǵy baılanysty da nyǵaıtamyz», - dep tolyqtyrdy sózín spıker.
Osylaısha, Belsendí ūzaq ómír súru ortalyǵy aǵa buynnyń belsendí bolyp qaluyna, damuyn jalǵastyryp, qoǵamdaǵy óz qajettílígín sezínuíne jaǵdaı jasap otyr.