Almatydaǵy atmosferalyq auanyń jaǵdaıy tek «Qazgıdromet» RMK-nyń baqylau beketterínen alynǵan málímetter negízínde júrgízíledí. Būl qyzmettíń barlyq qūrylǵysy sertıfıkattalǵan, memlekettík tízílímge engízílgen jáne míndettí tekseruden ótken. Būl turaly Almatynyń ekologıya jáne qorshaǵan orta basqarmasy habarlady.
Qala aumaǵynda 16 statsıonarlyq baqylau beketí ornatylǵan. Osy beketterdíń derekterí boıynsha aua sapasynyń kórsetkíshterí qoldanystaǵy sanıtarlyq-gıgıenalyq normatıvterge sáıkes qalyptastyrylady.
Būl rette, túrlí jekemenshík nemese kalıbrlenbegen qūrylǵylar taratatyn aqparat resmı bolyp sanalmaıdy. Mūndaı datchıkterdíń jaramdy sertıfıkaty joq, olar tekseruden ótpegen jáne memlekettík ólsheu qūraldary tízílímíne engízílmegen. Sondyqtan mūndaı qūraldardan alynǵan aqparatty senímdí derek retínde qoldanuǵa bolmaıdy.
Qazgıdromet málímetínshe, bıyl 24-25 qarashada joǵary (10 ShRK-dan joǵary) jáne asa joǵary (50 ShRK-dan joǵary) lastanu deńgeıí tírkelmegen. Jekelegen beketterde keıbír zattar boıynsha 1,0-2,1 ShRK shamasynda bír rettík azdaǵan asu baıqaldy.
Qaladaǵy qazírgí tútín qūbylystary aua raıynyń qolaısyz meteorologıyalyq jaǵdaılarymen qatar antropogendík faktorlarǵa da baılanysty. Sonyń bírí ınversıya, yaǵnı jyly aua qabaty tómengí suyq qabatty jauyp, tík baǵytta aua almasuyna kedergí keltíretín qūbylys.
Qarashanyń jelsíz aua raıy, kópjyldyq baqylaumen salystyrǵanda joǵary temperatura, jauyn-shashynnyń bolmauy jáne jylytu mausymynyń belsendílígí atmosferada zıyandy zattardyń jınaluyna yqpal etedí. Lastaushy kózder jeke tūrǵyn úıler, óndírístík nysandar jáne qala aumaǵynda paıdalanylatyn shamamen bír mıllıonǵa juyq avtokólík.
Búgínde Almatynyń aua basseınín negízgí lastaushy — avtokólík kólígí (shyǵaryndylardyń 60%-yna deıín). Qalǵan bólígí ónerkásíptík kásíporyndarǵa, jeke sektorǵa jáne qatty otyn paıdalanatyn monshaǵa tıesílí. Sondyqtan olardyń áserín tómendetu baǵytynda naqty sharalar qabyldau qajettílígí tuyndap otyr. Osy maqsatta Almaty qalasy ákímdígí tıístí jūmystar júrgízíp, atmosferalyq auany qorǵau erejeleríníń jobasyn ázírledí. Būl erejeler tómen shyǵaryndyly aımaqta avtokólík paıdalanuǵa shekteuler engízudí, úshínshí sanattaǵy kásíporyndardyń ekologıyalyq retteluín jáne auaǵa zıyandy zattar shyǵaryndylaryn azaıtuǵa baǵyttalǵan basqa da normalardy qamtıdy.
Resmı aqparat kózderíne ǵana senuge shaqyramyz.