Óńírlík kommunıkatsıyalar qyzmetínde Alǵys aıtu kúníníń mańyzy, tarıhı tamyry men qoǵamdyq kelísímdí nyǵaıtudaǵy rólí talqylandy, – dep habarlaıdy aqshamnews.kz tílshísí.
Qazaqstan halqy Assambleyasynyń múshesí, «Respublıkalyq dúngen etnomádenı ortalyǵy» RQB tóraǵasynyń orynbasary, pedagogıka ǵylymdarynyń doktory, Eurazıyalyq tehnologıyalyq unıversıtetíníń professory Rımma Masyrova osy merekeníń pálsapasy turaly aıtyp berdí.
1 nauryzda atap ótetín būl mereke HH ǵasyrdaǵy tarıhı oqıǵalarmen tyǵyz baılanysty. Sol kezeńde Qazaqstanǵa túrlí etnos ókílderí jer audaryldy. Qazaq halqy baryn beríp, olardy qabaq shytpaı qarsy aldy. Būl ózara qūrmet pen senímníń, sondaı-aq ūltaralyq kelísímníń bíregeı modelíníń qalyptasuyna negíz boldy. Búgínde Alǵys aıtu kúní Qazaqstan halqynyń bírlígín, ótkenge qūrmetí men syılastyǵyn arttyratyn merekege aınaldy.
«Alǵys aıtu kúní — beıbítshílík pen tūraqtylyqty saqtap qalǵan aǵa buyn men qazaq jeríne degen shynaıy alǵys aıtatyn mereke. Ol tarıhty qūrmetteudí úıretedí. Jastar úshín būl bírlík pen kelísímdí saqtap, nyǵaıtu qajet ekenín eske salatyn kún», — dep atap óttí Rımma Masyrova.
Onyń aıtuynsha, būl mereke ūltaralyq kelísím men qoǵamdyq bírlíktí nyǵaıtuda mańyzdy ról atqarady. Ol mádenıetter men dástúrlerdíń san aluandyǵy Qazaqstannyń basty kúshí ekenín kórsetedí, al qarapaıym alǵys sózderí adamdar arasyndaǵy senímdí qalyptastyrady.
«Qazaqstannyń kúshí — kóptúrlílíkte: bíz ártúrlímíz, bíraq teńbíz. Ártúrlí mádenıet pen dástúr ókílderí bír-bíríne “rahmet” pen “spasıbo” degende, sením artyp, dostyq nyǵayady. Naǵyz bírtūtas qoǵam osylaı qalyptasady», — dedí spıker.
Almatyda Alǵys aıtu kúnín atap ótudíń ózíndík dástúrlerí qalyptasqan. Būl — ūrpaqtar kezdesuí, júrekjardy alǵys sózderí, qaıyrymdylyq aktsıyalary, kontsertter men qoǵamdyq dıalogtar. Bıyl merekení ótkízu formattaryn keńeıtíp, jastardyń belsendí qatysuyna erekshe nazar audarylyp otyr.
«Bíz jastardyń qatysuyn ınteraktıvtí alańdar, volonterlík bastamalar jáne áleumettík aktsıyalar arqyly kúsheıtíp kelemíz. Búgínde jastar merekeníń belsendí kúshí, olar bírlík ıdeyalaryn zamandyq formattar men tsıfrlyq platformalar arqyly nasıhattap jatyr. Qalanyń ár tūrǵyny ózíníń ortaq íske qatystylyǵyn sezínuí kerek», — dedí Rımma Masyrova.
Sonymen qatar, ol ūzaq merzímdí nátıjege baǵyttalǵan bastamalardy erekshe atap óttí: meıírímdílík jobalary, tálímgerlík, aǵa buyndy qoldau jáne volonterlík qyzmet. Onyń sózínshe, alǵys aıtu bír kúnmen shektelmeı, ūlttyq mádenıettíń ajyramas bólígíne aınalyp, sením men bírlíktíń berík negízí boluy tıís.
Sóz sońynda spıker Alǵys aıtu kúní el bolashaǵyna ortaq jauapkershílík ıdeyasy tóńíregínde barlyq azamattardy bíríktíretínín atap ótíp, Qazaqstan dúngenderí atynan aǵa buynǵa, eńbek ūjymdary men jastarǵa olardyń eńbegí, jígerí men jasampazdyqqa ūmtylysy úshín alǵys bíldírdí.
