Almaty ákímí Darhan Satybaldynyń tóraǵalyǵymen qaladaǵy oqushy oryndarynyń tapshylyǵyn joyu jáne bílím beru ınfraqūrylymyn damytu jóníndegí keshendí jospardyń íske asyryluyna arnalǵan jūmys keńesí óttí, – dep habarlaıdy aqshamnews.kz tílshísí.
2025–2026 oqu jylynyń qorytyndysy boıynsha Almatydaǵy 360 mektepte 357 225 oqushy bílím aldy. Qazírgí tańda qalada 29 735 oqushy ornyna qajettílík bar. Ásírese, Áuezov, Alatau jáne Bostandyq audandarynda tapshylyq kóptep baıqalady. Júktemeníń artuyna mektep jasyndaǵy balalar sanynyń kóbeyuí jáne íshkí kóshí-qon áser etken. Tek byltyrǵy oqu jylynyń ózínde Almaty mektepteríne elímízdíń basqa óńírlerínen 17 847 oqushy auysyp kelgen. Olardyń jartysyna juyǵy Almaty oblysynan.
Keńes barysynda qoldanystaǵy tapshylyqty kezeń-kezeńímen azaıtuǵa múmkíndík beretín keshendí sharalar qaraldy. Jańa oqu jyly bastalǵanǵa deıín qalada segíz jańa mektep ashylady. Onyń jeteuí «Keleshek mektepterí» ūlttyq jobasy ayasynda, bíreuí jergílíktí byudjet qarajaty esebínen salynǵan mektep. Sonymen qatar qoldanystaǵy úsh mektepke qosymsha ǵımarattardyń qūrylysy ayaqtalady. Sonyń nátıjesínde 12 200 jańa oqushy orny ashylady.
Keńeste mektepke deıíngí bílím beru salasyn damytu jaıy da qaraldy. Qazírgí tańda Almatyda 1 098 balabaqsha jūmys ísteıdí, olarǵa 88 myńnan astam bala barady. Jyl basynan berí shamamen 3 myń oryndyq 33 jańa balabaqsha ashyldy. Jyl sońyna deıín taǵy 23 balabaqsha ashu josparlanǵan. Būl mektepke deıíngí bílímmen qamtu deńgeıín 96,6%-ǵa jetkízíp, kezekte tūrǵan balalar sanyn ekí myńǵa deıín qysqartuǵa múmkíndík beredí.
Keńes sońynda Almaty ákímí jańa bílím beru nysandaryn uaqytyly paıdalanuǵa berudí, barlyq jobanyń júzege asyryluyn kúsheıtudí jáne shahardaǵy halyq sany qarqyndy ósíp jatqan audandarda oqushy oryndarynyń tapshylyǵyn kezeń-kezeńímen joyu úshín qosymsha sharalar qabyldaudy tapsyrdy.