«Almaty – Túrkí álemíníń jastar astanasy 2025» jobasy ayasynda ūıymdastyrylǵan Túrkí memleketterí ūıymynyń halyqaralyq jastar lagerí Almatyda máresíne jettí, – dep habarlaıdy aqshamnews.kz tílshísí.
Úsh kún boıy Qazaqstan, Túrkıya, Ázerbaıjan, Qyrǵyzstan, Ózbekstan jáne Túríkmenstannan kelgen jas kóshbasshylar túrkí keńístígíndegí yntymaqtastyqty nyǵaıtuǵa jáne jastar arasyndaǵy ózara baılanysty damytuǵa baǵyttalǵan bílím beru, ekologıyalyq jáne mádenı ís-sharalarǵa qatysty.
«Almatydaǵy halyqaralyq jastar lagerí túrkí memleketteríníń jastary ortaq syn-qaterler men bastamalar boıynsha bírlesíp jūmys ísteuge daıyn ekenín kórsettí. Osyndaı jobalar halyqtar arasyndaǵy dostyqty nyǵaıtyp, bolashaqtaǵy yntymaqtastyqtyń berík negízín qalaıdy», – dedí Qyrǵyz Respublıkasynyń Mádenıet, aqparat jáne jastar sayasaty mınıstríníń bírínshí orynbasary Soyuzbek Nadyrbekov.
Lager baǵdarlamasy jastardy qazírgí zamannyń ózektí taqyryptary tóńíregíne toptastyrdy. Alǵashqy kúní qatysushylar bír-bírímen tanysyp, jastar sayasaty, kóshbasshylyq jáne halyqaralyq yntymaqtastyqty damytu máseleleríne arnalǵan ashyq dıalogtar men píkírtalas alańdaryna qatysty.
Ekínshí kún ekologıya, tsıfrlandyru jáne qoǵamdyq damu taqyryptaryna arnaldy. Jastar «Taza Qazaqstan» jalpyūlttyq bastamasyn qoldau maqsatynda ūıymdastyrylǵan Turkic Youth Tree of Unity halyqaralyq ekologıyalyq aktsıyasyna qatysyp, túrkí memleketterí jastarynyń bírlígí men jastar bastamalarynyń sabaqtastyǵynyń belgísí retínde kóshet otyrǵyzdy. Sonymen qatar, Digital Turkic Youth forumy ótíp, qatysushylar jasandy ıntellekt pen tsıfrlyq tehnologıyanyń qoǵamnyń damuyna jáne bolashaq daǵdysyn qalyptastyruǵa yqpalyn talqylady. Ashyq árí ádílettí qoǵam qūrudaǵy jastardyń rólíne de erekshe nazar audaryldy.
Qorytyndy kún lagerdíń jabylu saltanatymen bastaldy. Ís-shara barysynda úsh kúndík baǵdarlama qorytyndylanyp, qatysushylarǵa sertıfıkattar tabystaldy. Sondaı-aq, «What I Take With Me» atty ashyq dıalog alańy ūıymdastyrylyp, jastar áserín, alǵan tájírıbesín jáne aldaǵy yntymaqtastyqqa qatysty ıdeya bólístí.
Lagerdíń ayaqtaluyna oraı Almaty qalasy Jastar sayasaty basqarmasynyń basshysy Azız Kajdenbek qatysushylardy qūttyqtap, mūndaı bastamalardyń túrkí memleketterí jastary arasyndaǵy dostyqty nyǵaıtu men halyqaralyq jastar yntymaqtastyǵyn damytudaǵy mańyzyn atap óttí.
Qatysushylar sondaı-aq Almaty Museum of Arts muzeıíne baryp, qalanyń zamanauı mádenı keńístígímen tanysty. Būl ekskursıya lager baǵdarlamasynyń qorytyndy ís-sharasyna aınaldy.
«Úsh kún boıy Almaty túrkí memleketteríníń jas ókílderí úshín ashyq dıalogtyń, tájírıbe almasudyń jáne dostyq baılanysty nyǵaıtudyń alańyna aınaldy. Osyndaı bastamalar halyqaralyq jastar dıalogyn damytuǵa jáne túrkí keńístígíndegí ózara yqpaldastyqty keńeıtuge yqpal etedí», – dedí Azız Kajdenbek.
Túrkí memleketterí ūıymynyń halyqaralyq jastar lagerí tájírıbe almasuǵa, jańa bastamalardy damytuǵa jáne túrkí álemíníń jas kóshbasshylary arasyndaǵy baılanysty nyǵaıtuǵa arnalǵan mańyzdy alań boldy. Onyń ayaqtaluy «Almaty – Túrkí álemíníń jastar astanasy 2025» jobasynyń qorytyndy ís-sharalarymen tūspa-tūs kelíp, Túrkí memleketterí ūıymyna múshe elder arasyndaǵy jastar dıplomatıyasy men gumanıtarlyq yntymaqtastyqty damytudaǵy mańyzdy kezeńderdíń bíríne aınaldy.