Almaty qalasy ákímí Darhan Satybaldynyń tóraǵalyǵymen turızm ınfraqūrylymyn damytu jáne qonaqúı men glempıng qūrylysyna qatysty ınvestıtsıyalyq jobalardy júzege asyru máselelerí boıynsha jıyn óttí. Oǵan salalyq basqarma basshylary, ınvestorlar men bıznes ókílderí qatysty.
Ásírese, qonaqúı bıznesíne qyzyǵushylyq tanytyp otyrǵan jeke ınvestorlardyń rólíne aıryqsha nazar audaryldy. Bıylǵy jyldyń qańtar-mausym aılarynda ornalastyru salasyna tartylǵan jeke ınvestıtsıya kólemí byltyrǵy kórsetkíshpen salystyrǵanda on úsh esege ósken. Būl Almaty turızmíníń serpíndí damyp kele jatqanyn aıǵaqtaıdy. Qalalyq Turızm basqarmasynyń deregínshe, búgínde megapolıste 70-ten astam ınvestıtsıyalyq joba qolǵa alynǵan. Olardyń bír bólígí aldaǵy jyldary ayaqtalsa, jalpy jobalardyń tolyq júzege asu merzímí 2030 jylǵa deıín josparlanǵan. Bıyldyń ózínde bírneshe jańa qonaqúı paıdalanuǵa beríldí, jyl sońyna deıín taǵy da qonaqúıler, turıstík keshender men glempıngter íske qosylmaq. 2025-2027 jyldar aralyǵynda qaladaǵy qonaqúı nómírleríníń qory 1,5 esege ūlǵaıyp, 17 myńǵa deıín jetpek.
Darhan Satybaldy turızmdí damytudyń basty baǵyttarynyń bírí zamanauı qonaqúı ınfraqūrylymyn qalyptastyru jáne turısterge qolaıly jaǵdaı jasau ekenín atap óttí. Sondaı-aq, ákím ekologıyalyq talaptardy qatań saqtap, turıstík nysandardyń tabıǵı árí mádenı mūramen úılesímdí salynuy asa mańyzdy ekenín jetkízdí.
Jıyn qorytyndysy boıynsha qala ákímí tıístí rásímderdí jedeldetudí, ınvestıtsıyalyq jobalardy qajettí ınjenerlík ınfraqūrylymmen qamtamasyz etudí jáne jobalardy júzege asyrudyń barlyq kezeńínde ınvestorlarǵa qoldau kórsetudí tapsyrdy.