Almaty qalasynda áleýmettik mańyzy bar azyq-túlik taýarlarynyń (ÁMAT) baǵasyn turaqtandyrý tetikterin iske asyrý aıasynda «Almaty» ÁKK» AQ «Alataý-qus» kompanıasymen taýyq etin (san eti) jetkizý jáne satý boıynsha forvardtyq qaryz shartyna qol qoıdy. «Alataý-qus» 30 fırmalyq dúkenge 358,8 tonna taýyqtyń san etin jetkizip, qala turǵyndaryna kelisin 1650 teńgeden satady. Turaqtandyrý merzimi - 24 aı. Bul týraly «Almaty» ÁKK» ókilderi habarlady.
Buǵan deıingi kelisim negizinde «Alataý-qus» kompanıasy taýyqtyń san eti men jambasyn turǵyndarǵa kelisin 1100 teńgeden satyp otyr.
Sondaı-aq, «Almaty» ÁKK» jergilikti óndirýshilerden 4500 tonna qumsheker satyp aldy. Otandyq qant «Magnum», «Small», «Toimart», «Stolıchnyı», «Iýbıleınyı» jáne ózge saýda jelilerinde 10%-dan aspaıtyn ústemaqymen satylady. Óndirýshi bekitken baǵa – kelisine 405 teńge. Turaqtandyrý kelesi jyldyń qarashasyna deıin jalǵasady.
Aıta keteıik, bıyl naýryz aıynda «Almaty» ÁKK» men «Magnum Cash&Carry» arasynda áleýmettik mańyzy bar 11 túrli azyq-túlik taýarynyń baǵasyn turaqtandyrýǵa baǵyttalǵan kelisim jasalǵan bolatyn. Jalpy kólemi – 606 tonna. Tizimge qaraqumyq jarmasy, makaron ónimderi (ólshenip satylatyn), kúrish, kúnbaǵys maıy, maılylyǵy 2,5% jumsaq qaptamadaǵy aıran, maılylyǵy 72,5% sary maı, maılylyǵy 2,5% pasterlengen jumsaq qaptamadaǵy sút, taýyq eti (san, jambas), birinshi surypty un, sıyr eti (jaýyryn-keýde bóligi) jáne as tuzy endi. Baǵany turaqtandyrý sharalary 2026 jyly naýryzǵa deıin jalǵasady.
Taýyq jumyrtqasynyń qunyn turaqtandyrý baǵytynda «Sary-Bulaq» kompanıasymen 2024 jyly qazannan 2027 jyly qazanǵa deıin birinshi sanattaǵy 86,4 mln dana jumyrtqa óndirý jáne ótkizý jónindegi kelisim júzege asyp otyr. Ónim qaladaǵy iri saýda jelilerine, «Alataý-Qus» fırmalyq dúkenderine jáne shaǵyn dúkenderge jetkiziledi. Óndirýshi belgilegen baǵa – danasy 51 teńge, al saýda oryndarynda ústemaqy 15%-dan aspaýǵa tıis.
Buǵan qosa, Almatyda ár senbi jáne jeksenbi kúnderi aýyl sharýashylyǵy jármeńkesi ótedi. Bul jerlerde áleýmettik mańyzy bar ónimder naryqtaǵy baǵadan 15-20% tómen saýdalanady. Jármeńke qalanyń bes aýdanynda uıymdastyrylady:
* Almaly aýdany — Masanchı kóshesi (Áıteke bı jáne Gogol kósheleriniń arasy);
* Almaly aýdany — Jambyl men Áýezov kósheleriniń qıylysy;
* Áýezov aýdany — Ótegen batyr kóshesi (Abaı dańǵylynan tómen);
* Bostandyq aýdany — Qazaqfılm shaǵynaýdany (ál-Farabı dańǵylynan joǵary);
* Medeý aýdany — Meńdiqulov býlvary – Bekturov kóshesi;
* Jetisý aýdany — Qulager shaǵynaýdany, Serikov kóshesi, 2.