Ideıasyn iske asyrǵysy keletin jastar mıllıon teńgege deıin ala alady
Almaty qalasynyń Jastar saıasaty basqarmasynyń qoldaýymen «Adyrna» ulttyq-etnografıalyq birlestigi» qoǵamdyq qory «Táýelsizdik urpaqtary» granttaryn berý maqsatynda aýqymdy is-sharalardy júzege asyryp jatyr. Almatynyń Óńirlik komýnıkasıalar qyzmetiniń baspasóz konferensıasynda, Almaty qalasynyń Jastar saıasaty basqarmasy basshysynyń orynbasary Almaz Keńesbaı men «Adyrna» qoǵamdyq qorynyń jetekshisi Kárim Islam osy baıqaýǵa tolyǵyraq toqtaldy, dep habarlaıdy aqshamnews.kz
Jobanyń negizgi maqsaty – Táýelsiz Qazaqstannyń damýyna úles qosatyn, zamanǵa saı, bilimdi, bastamashyl jáne otanshyl jas urpaqty qoldaý. Granttar jastardyń ınovasıalyq, shyǵarmashylyq, ǵylymı, kásipkerlik, mádenı jáne áleýmettik jobalardy iske asyrýyna múmkindik bermek. Ótinishti bıylǵy 1 mamyrdan 1 tamyzǵa deıin qabyldaıdy.
«Bul joba – jastardyń el ıgiligine baǵyttalǵan ıdeıalaryn júzege asyrýǵa arnalǵan úlken múmkindik. Biz belsendi jastardyń árqaısysyna qoldaý kórsetýge ázirmiz», – deıdi Almaz Keńesbaı.
Baıqaý myna baǵyttar boıynsha ótedi:
• Ǵylym – ǵylymı zertteýler men jobalardy qoldaý;
• Mádenıet – ulttyq murany nasıhattaý;
• Aqparattyq tehnologıalar – IT sheshimder men startaptar;
• Bıznes – jańa bıznes-ıdeıalardy iske asyrý;
• Medıa – tanymdyq jáne paıdaly kontent qurý.
«Biz jastardyń qoǵamǵa paıdaly jobalardy iske asyryp, azamattyq belsendiligin arttyrýyna kómekteskimiz keledi. Maqsatymyz ıdeıany qarjylandyrý ǵana emes, belsendi jastardyń qoǵamdastyǵyn da qalyptastyrý», - dep qosty Kárim Islam.
Ár granttyń somasy – 1 000 000 teńge. Jalpy 13 jeńimpaz anyqtalady.
Baıqaý - ótinimderdi qabyldap, ony baǵalaıtyn eki kezeńnen turady. Komısıa quramyna memlekettik organnyń ókilderi, sarapshylar men ǵalymdar kirgen.
Jobanyń keńsesi Almaty qalasy, Tımırázev kóshesi, 59 A mekenjaıynda jumys kúnderi 09:00-den 18:30-ǵa deıin jumys isteıdi (senbi, jeksenbi jáne mereke kúnderin qospaǵanda).
Qosymsha aqparat pen onlaın ótinish berýge arnalǵan jobanyń platformasy: opengrantalmaty.kz
Baılanys telefondary saıtta kórsetilgen.
Uıymdastyrýshylar Almatynyń belsendi jastaryn baıqaýǵa qatysyp, óz ıdeıasyn júzege asyrýǵa shaqyrady.