Almaty tau klasterí jobasyn júzege asyru praktıkalyq kezeńge óttí, – dep habarlaıdy aqshamnews.kz tílshísí.
«Almaty Tau Management» JShS málímetínshe, daıyndyq jūmystary «Shymbūlaq» kurortynda, sondaı-aq Būtaqty jáne Kímasar shatqaldarynda bastaldy.
«Shymbūlaqta» ekí jańa kótergísh — tórt oryndyq aspaly jol men súıretpelí kótergísh salynyp jatyr. Olar kurorttyń ótkízu qabíletín arttyruǵa, kelushíler sanyn tıímdí bóluge jáne shańǵy tebu jaılylyǵyn jaqsartuǵa múmkíndík beredí.
Būtaqty shatqalynda bolashaq aspaly jol stantsıyalaryna arnalǵan alańdar daıyndalyp, ınjenerlík-geologıyalyq zertteuler júrgízílude. Qūrylys tehnıkasynyń júruí jáne ınjenerlík jelílerdí tartu úshín «Būtaqty – 2000 m» baǵyty boıynsha tehnologıyalyq jol salu jūmystary bastaldy. Būl negízgí qūrylys-montaj jūmystaryna kíríspes būryn atqarylatyn qajettí kezeń. Ol shamamen 2–3 aptaǵa sozylady.
Kímasar shatqalynda bolashaq bazalyq stantsıya ornalasatyn qūrylys alańy daıyndaldy. Barlyq uchaskede jasyl jelekter zerttelíp jatyr. Mamandar aǵashtardyń qazírgí jaǵdaıy men ornalasuyn tírkep, keıíngí jobalau kezínde tabıǵı landshaftty eskeruge jáne oǵan áserdí barynsha azaıtuǵa mán beredí. Aǵashtardy tańbalau — olardy zertteu jáne esepke alu rásímíníń bír bólígí.
Eske salaıyq, Almaty tau klasterí «Shymbūlaq» pen «Oi-Qaragai» kurorttaryn aspaly joldar men tau shańǵysy trassalarynyń bíryńǵaı júıesí arqyly bíríktírudí kózdeıdí.
Joba ekologıyalyq tūraqtylyq qaǵıdattaryn eskere otyryp júzege asyrylady. Jer bederíne áserdí barynsha azaıtu, ekologıyalyq dálízder men su resursyn saqtau, tūraqty ekologıyalyq monıtorıng júrgízu jáne ekologıyalyq rásímderdí saqtau qarastyrylǵan.
Kelushílerdíń qauípsízdígín qar kóshkínínen qorǵaudyń keshendí júıesí, qūtqaru beketterí men medıtsınalyq punktter qamtamasyz etedí. Kólík qoljetímdílígín arttyru maqsatynda kólík qaldyruǵa arnalǵan tūraqtar, qoǵamdyq kólík, tegín elektr shattldary jáne tau aumaqtary arasynda qatynaıtyn, onyń íshínde aspaly joldardy qamtıtyn bíryńǵaı qozǵalys júıesí josparlanǵan.
Joba jyl boıy sportpen shūǵyldanuǵa jáne belsendí demalysqa, shańǵy mektepterín damytuǵa, būqaralyq ís-sharalar ótkízuge jáne nūsqaushylar dayarlauǵa jaǵdaı jasaıdy. Sondaı-aq qoljetímdí ınfraqūrylym, otbasylyq jáne beıímdelgen sport arqyly áleumettík jáne ınklyuzıvtí baǵyt saqtalady.
Jobany júzege asyru bıznes, turızm, kólík jáne qūrylys salalarynyń damuyna serpín beríp, 10 myńnan astam jūmys ornyn ashuǵa múmkíndík beredí. Esep boıynsha, jobanyń ekonomıkalyq tıímdílígí jylyna 500 mlrd teńgeden asady.