Almatyda «Sırıýs» bilim berý ortalyǵymen yntymaqtastyq aıasynda I Talanttar samıti ótti. Samıt barysynda «Sırıýs» mektebi men bilim berý ortalyǵynyń irgetasyn qalaý rásimi ótti.
İs-sharaǵa Qazaqstan Respýblıkasy Premer-mınıstriniń orynbasary - mádenıet jáne aqparat mınıstri Aıda Balaeva, QR Oqý-aǵartý mınıstri Juldyz Súleımenova, Almaty qalasynyń ákimi Darhan Satybaldy, «Sırıýs» federaldyq aýmaǵy keńesiniń tóraǵasy jáne «Talant ı ýspeh» qorynyń jetekshisi Elena Shmeleva, ǵylymı jáne pedagogıkalyq qaýymdastyq ókilderi qatysty.
«Sırıýs» mektebinde matematıka, fızıka, hımıa jáne bıologıa pánderi boıynsha kiriktirilgen baǵdarlamalar, sondaı-aq jasandy ıntellekt, ǵarysh, ınjenerıa jáne ómir týraly ǵylymdar baǵytyndaǵy pánaralyq kýrstar memlekettik jáne orys tilderinde Qazaqstan Respýblıkasynyń memlekettik bilim berý standartyna sáıkes júzege asyrylady.
Qazaqstandyq oqýshylar «Sırıýs» ortalyǵynyń baǵdarlamalaryna qazirdiń ózinde qatysýda. 2024-2025 jyldar aralyǵynda balalar «Úlken perspektıvalar» ǵylymı-tehnologıalyq baıqaýynyń jobalyq komandalarynda jumys istedi. Sonymen qatar Qazaqstan quramasy jasóspirimder arasyndaǵy IJSO-2025 halyqaralyq jaratylystaný olımpıadasynda 6 medal jeńip aldy.
Samıtke daryndy oqýshylar men jaratylystaný-matematıkalyq baǵyttaǵy pedagogter qatysty. Samıt aıasynda mektep pen ortalyq jobasynyń tanystyrylymy, «Sırıýs» mamandarynyń dáristeri men sheberlik sabaqtary, «Úlken perspektıvalar» baıqaýy jobalarynyń kórmesi, sondaı-aq muǵalimderge arnalǵan kýrs ótti.
Samıt baǵdarlamasy aıasynda oqýshylarǵa arnalǵan ǵylymı-kópshilik dárister, «Sırıýs» jetekshi sarapshylarynyń sheberlik sabaqtary, matematıka jáne jaratylystaný pánderi pedagogterine arnalǵan biliktilikti arttyrý baǵdarlamasy da ótkizildi. Oqýshylar genetıkalyq jáne aqparattyq tehnologıalardyń damýymen tanysyp, kvadrokopter nemese robot qurastyryp, baǵdarlamalap kórdi, mıdyń jumys isteý erekshelikterin zerdelep, «Sırıýs» bilim berý ortalyǵynyń akademıalyq jáne ındýstrıalyq seriktesterinen usynylǵan jobalyq tapsyrmalarmen jumys istedi.
«Búgin ǵımarattyń alǵashqy kirpishi qalandy. Bul jaı ǵana sımvoldyq qadam emes, bul mekteptiń qalaı qurylatynyn aıqyndaıtyn praktıkalyq jumystyń bastalýy. Ol bilim berý baǵdarlamalaryn qalyptastyrýdan bastap oqý prosesin uıymdastyrýǵa deıingi barlyq kezeńdi qamtıdy. Joba jaratylystaný ǵylymdary men zamanaýı tehnologıalar salasyna kiriktirilgen baǵyttarǵa negizdelip, Qazaqstan Respýblıkasynyń memlekettik bilim berý standarttaryna sáıkes júzege asyrylady», - dep atap ótti Aıda Balaeva.
«Búgin biz memleketterimizdiń basshylary qoıǵan strategıalyq mindetti sheship otyrmyz. Úzdik pedagogtermen, ǵalymdarmen jáne tehnologıalyq kompanıalardyń ókilderimen birlese otyryp, Qazaqstan oqýshylarynyń talantyn damytýǵa barlyq jaǵdaı jasalǵan zıatkerlik, mazmundy jáne qaýipsiz orta qalyptastyryp jatyrmyz. Qazirgi balalar keıde tájirıbeli mamandardyń ózi qınalatyn máselelerdi sheshýge daıyn. Sondyqtan «Sırıýs» jobalyq qyzmetti damytýǵa erekshe mán beredi. Bizdiń flagmandyq jobamyz sanalatyn “Úlken perspektıvalar” baıqaýy osynyń aıqyn dáleldeıdi. Bıyl baıqaý 11-ret ótkizilip, halyqaralyq mártebe aldy», - dedi Elena Shmeleva.
Sonymen qatar, QR Oqý-aǵartý mınıstrligi QR Ǵylym jáne joǵarǵy bilim mınıstrligimen birlesip Abaı atyndaǵy Qazaq ulttyq pedagogıkalyq ýnıversıteti men Qazaq ulttyq qyzdar pedagogıkalyq ýnıversıtetiniń bazasynda «Sırıýs» ýnıversıtetiniń «Ǵylymı-tehnologıalyq bilim berý kóshbasshylary» atty eki jyldyq magıstrlik baǵdarlamasyn iske qosady. Baǵdarlama daryndy balalarmen jumys isteýge, jaratylystaný jáne tehnıkalyq baǵyttar boıynsha, sonyń ishinde pedagogıkada jasandy ıntellektini qoldaný salasynda mamandar daıarlaýǵa baǵyttalǵan.