Almatyda atmosferalyq auanyń lastanuyn azaıtu sharalary kúsheıtíledí. Būl turaly qala ákímí Darhan Satybaldy ekologıya máselelerí jóníndegí keńeste málímdedí, – dep habarlaıdy aqshamnews.kz tílshísí.
Júrgízílgen esepteulerge sáıkes, Almaty aglomeratsıyasyndaǵy jyldyq shyǵaryndylar kólemí 225,2 myń tonna, onyń 189 myń tonnasy Almaty qalasyna tıesílí. Lastanudyń negízgí kózí avtokólíkterde – shamamen 60%. Būdan keıín energetıka nysandary, ónerkásíp kásíporyndary, jeke sektor men qūrylys salasy keledí.
Qala basshysy barlyq shyǵaryndylar kózderíne, sonyń íshínde kólík pen bızneske baqylaudy kúsheıtudí tapsyrdy. Qaıtalanatyn zańbūzushylyqtar kezínde aıyppūlmen shektelmeı, qyzmettí uaqytsha toqtatuǵa deıíngí qatań sharalar qoldanu qajettígí atap óttí.
Sonymen qatar, tūrǵyndar men kásípkerler arasynda túsíndíru jūmystary júrgízíledí. Gazǵa kóshu, súzgí júıelerín ornatu jáne ekologıyalyq talaptardy saqtau júıelí túrde júzege asyryluǵa tıís.
Negízgí tetík retínde Almaty qalasynda atmosferalyq auany qorǵau qaǵıdalaryn íske asyru kózdelíp otyr. Osy ayasynda tómen emıssıyaly aımaqtar (LEZ) kezeń-kezeńímen engízíledí.
Qalada sondaı-aq, qoǵamdyq kólíktí ekologıyalandyru jáne qorshaǵan orta sapasyn jaqsartuǵa baǵyttalǵan kógaldandyru jūmystary jalǵasady.