Almatyda aptap ystyqqa baılanysty su aıdyndarynda qauípsízdík sharalary kúsheıtíldí. Qūtqarushylar shomyluǵa tyıym salynǵan aumaqtarda kún saıyn reıd júrgízíp, tūrǵyndarǵa túsíndíru jūmystaryn júrgízíp jatyr, dep habarlaıdy Aqshamnews.kz Almaty.tv arnasyna sílteme jasap.
Mamandardyń aıtuynsha, jaz mezgílínde demalushylar kóp baratyn oryndardyń bírí – Saıran kólí. Alaıda mūnda shomyluǵa álí de tyıym salynǵan. Sebebí su astynda tereń shūńqyrlar, kúrt ózgeretín tereńdík pen tík eńíster bar. Osyǵan qaramastan keıbír tūrǵyndar tyıymǵa qaramastan suǵa túsudí jalǵastyruda.
Qūtqarushylar táulík boıy su aıdynyn baqylap, jaǵalau boıynda kúndelíktí patruldeu men profılaktıkalyq reıdter ūıymdastyrady. Demalushylarǵa qauíptí aumaqtarda shomylmau jónínde eskertu jasalady.
Qauíptí oryndardyń bírí – Alatau audanyndaǵy Shańyraq-1 shaǵyn audanyndaǵy Úlken Almaty kanaly. Mūnda da shomyluǵa bolmaıdy. Degenmen ystyq kúnderí tūrǵyndar, ásírese balalar, suǵa túsu úshín osy jerge jıí keledí.
Alatau audandyq tótenshe jaǵdaılar basqarmasynyń ınjenerí Erkebūlan Tóleudíń aıtuynsha, bıyl shomyluǵa tyıym salynǵan oryndarǵa 100-ge juyq eskertu belgísí ornatylǵan. Óıtkení kanaldaǵy aǵys óte qatty árí su túbíníń jaǵdaıy belgísíz bolǵandyqtan, būl jer adamdardyń ómíríne qauíp tóndíredí.
Jalpy Almaty qalasy men tau bókterínde ózender, kólder, kanaldar men toǵandardy qosa eseptegende 44 su aıdyny bar. Onyń 10-y shomylu mausymynda asa qauíptí aumaq retínde belgílengen. Olardyń qatarynda Saıran kólí, Áuejaı kólí, Shańyraq shaǵyn audanyndaǵy Úlken Almaty ózení men Esentaı ózení bar.
TJD málímetínshe, qauíptí uchaskelerde kún saıyn reıdter ūıymdastyrylyp, qauípsízdík talaptarynyń saqtaluy baqylauǵa alynady.
Sondaı-aq qūtqarushylardyń deregínshe, bıylǵy shomylu mausymy bastalǵaly Almatyda sudaǵy jazataıym oqıǵalar tírkelmegen. Al rūqsat etílmegen oryndarda shomylǵandarǵa 7 aılyq eseptík kórsetkísh kólemínde, yaǵnı 30 myń teńgeden astam aıyppūl qarastyrylǵan.