Almatyda shahmattan III ashyq Senat Open-2026 kubogynyń shırek fınaldyq kezeńí bastaldy. Kelesí kezeńge joldama alu úshín 160 qatysushy baq synap jatyr, – dep habarlaıdy aqshamnews.kz tílshísí.
Olardyń qatarynda íríkteu kezeńderíníń jeńímpazdary, máslıhat deputattary, Qoǵamdyq keńes múshelerí, BAQ ókílderí jáne túrlí sala mamandary bar.
Turnır Qazaqstan Respublıkasy Parlamentí Senaty men Almaty qalasy máslıhatynyń qoldauymen ótíp jatyr. Jarysty Qazaqstan shahmat federatsıyasy ūıymdastyrǵan.
Qatysushylarǵa Almaty qalasy máslıhatynyń tóraǵasy Meıírjan Otynshıev qūttyqtau sóz arnady. Ol Senat Open túrlí kásíp pen jastaǵy adamdardy bíríktíretín erekshe alańǵa aınalǵanyn atap óttí.
“Senat Open — ártúrlí mamandyq ıelerí men túrlí jastaǵy adamdardyń basyn qosatyn bíregeı alań. Būl kezeńníń mańyzy erekshe. Úzdík shahmatshylar kelesí kezeńde Almatynyń namysyn qorǵaıdy. Barshańyzǵa sáttílík tíleımín. Myqty jeńíske jetsín, — dedí Meıírjan Otynshıev.
Qazaqstan shahmat federatsıyasynyń vıtse-prezıdentí Beket Jarokov turnırdíń áuesqoı sıpatta ótetínín aıtty. Onyń sózínshe, Senat Open shahmatty shyn jaqsy kóretín adamdardy kásíbí men mártebesíne qaramaı bíríktíredí.
“Bíz parkterde oınadyq, bíreuler ınternette oınady. Bárímízdí osy oıynǵa degen súıíspenshílík bíríktíredí. Úsh jyl būryn túrlí sala ókílderí arasynda turnır ótkízudí bastadyq. Maqsatymyz — qyzmetkerlerdíń kúndelíktí jūmystan bír sát sergíp, jastyq shaǵyn eske aluyna múmkíndík beru, — dedí Beket Jarokov.
Qatysushylar shveıtsarıyalyq júıe boıynsha 9 tur oınaıdy. Turnır rapıd formatynda ótedí. Uaqyt baqylauy — 10+5, yaǵnı ár partıyaǵa 10 mınut beríledí jáne bírínshí júrísten bastap ár júríske 5 sekund qosylady.
Jeke esepte jeńímpazdar medaldarmen jáne dıplomdarmen marapattalady. Úzdíkter eń kóp ūpaı sany boıynsha anyqtalady. Nátıje teń bolǵan jaǵdaıda Buhgolts koeffıtsıentí, jeke kezdesu qorytyndysy jáne jeńíster sany eskeríledí.
Sonymen qatar ūıymdastyrushylar 10 arnaıy nomınatsıya boıynsha jeńímpazdardy marapattaıdy. Júldeler ardagerlerge, áıelderge, memlekettík qyzmetshílerge, ūlttyq kompanıya qyzmetkerleríne, deputattar men máslıhat apparatynyń qyzmetkerleríne, Qoǵamdyq keńes músheleríne, kúshtík qūrylymdar men qūqyq qorǵau organdarynyń ókílderíne, densaulyq saqtau, ǵylym jáne bílím, mádenıet pen óner salasynyń mamandaryna, sondaı-aq BAQ ókílderíne beríledí.