Almatyda Roza Baǵlanova tūrǵan úıde mural salyndy, – dep habarlaıdy aqshamnews.kz tílshísí.
Almatynyń Medeu audanyndaǵy Samal-3 shaǵynaudany, 21-úıdíń qasbetíne KSRO Halyq artısí, aty ańyzǵa aınalǵan ánshí Roza Baǵlanovanyń keskíní beınelengen mural salyndy.
Mural tūrǵyndardyń ákímdíkke jasaǵan ótíníshí negízínde júzege asyryldy. Osydan keıín kórkem nysandy jasau jūmystary ūıymdastyrylǵan. Jobanyń erekshe mańyzdylyǵy — Roza Baǵlanovanyń kezínde dál osy úıde tūrǵanynda. Endí ǵımarat qasbetí ūly óner ıesíne degen qūrmet pen taǵzymnyń sımvolyna aınaldy.
Jobany daıyndau jáne júzege asyru jūmystaryna Roza Baǵlanovanyń kelíní Maral Baǵlanova da qatysqan. Ol atqarylǵan jūmysqa joǵary baǵa beríp, jobany júzege asyrǵan azamattarǵa alǵys bíldírdí.
Osylaısha, Halyq artısíníń jarqyn beınesí endí halyq jadynda árí ūlttyq óner tarıhynda ǵana emes, Almaty qalasynyń sáulettík kelbetínde de máńgílíkke saqtalmaq.