Almatyda arnaıy jabdyqtalǵan Yandex Qazaqstan avtokólíkterí qalanyń joǵary dáldíktegí tsıfrlyq kartasyn jasau úshín joldar turaly derekter jınauǵa kírístí. Mūndaı karta avtonomdy kólíktí synaqtan ótkízudíń kelesí kezeńíne qajet.
Sapar barysynda avtokólíkter jol tańbalaryn, baǵdarshamdardy, jol belgílerín, qıylystardy jáne jol ınfraqūrylymynyń basqa da elementterín tírkeıdí. Ol úshín kameralar, lıdarlar jáne ózge de sensorlar paıdalanylady. Jınalǵan aqparat negízínde Almaty kósheleríníń egjeı-tegjeılí tsıfrlyq modelí jasalady.
«Bíz úshín jasandy ıntellekttíń qalyptasqan salalar men kúndelíktí ómírdí ózgertetín naqty jūmys ísteıtín tehnologıyaǵa aınaluy mańyzdy. Avtonomdy kólík — osyndaı ózgerístíń eń aıqyn mysaldarynyń bírí. Bíz avtonomdy avtokólíkterdí naqty qalalyq ortada synaqtan ótkízu úshín qajettí normatıvtík jaǵdaılardy jasap qoıdyq. Kelesí qadam — qajettí tehnologıyalyq ınfraqūrylymdy qalyptastyru. Almatynyń joǵary dáldíktegí kartasyn jasau — osy jūmystyń bír bólígí.
Bíz jańa tehnologıyalardyń Qazaqstanda damuyna múmkíndík bere otyryp, olardy engízudíń basty sharty — adamdardyń qauípsízdígín qamtamasyz etemíz. Sondyqtan avtonomdy kólík kezeń-kezeńímen, synaqtan ótkízu, naqty jaǵdaılardy taldau jáne retteu tetíkterín jetíldíru arqyly engízíledí», — dedí QR Premer-Mınıstríníń orynbasary – Jasandy ıntellekt jáne tsıfrlyq damu mınıstrí Jaslan Mádıev.
Joǵary dáldíktegí karta avtonomdy avtokólíkke ózíníń qaı jerde tūrǵanyn jáne joldyń naqty bír bólígíníń qalaı ūıymdastyrylǵanyn túsínuge kómektesedí. Qozǵalys kezínde júıe aınaladaǵy jaǵdaıdy naqty uaqyt rejımínde qosymsha taldaıdy.
«Almaty — kúrdelí árí aluan túrlí kólík ınfraqūrylymy bar elímízdegí eń írí megapolıs. Qala úshín jańa tehnologıyalardyń múmkíndíkterín zerttep, olardy qauípsíz engízuge jaǵdaı jasau mańyzdy. Avtokólíkterdíń kartografıyalau jūmystaryna shyǵuy qalalyq ortanyń erekshelíkterín baǵalauǵa jáne jobanyń kelesí kezeńderíne qajettí tehnologıyalyq negízdí daıyndauǵa múmkíndík beredí», — dedí Almaty qalasy Tsıfrlandyru basqarmasynyń basshysy Sábıt Nūrqanat.
Qazírgí kezeńde avtokólíkter tek qalanyń jol jelísí turaly derekter jınap jatyr. Olar ázírge jolaushylardy avtonomdy rejımde tasymaldamaıdy.