Qoljazbalar ūlttyq mádenı jáne zıyatkerlík mūranyń mańyzdy qūramdas bólígí retínde tarıhı jadyny jańǵyrtuda, ūlttyq bíregeılíktí nyǵaıtuda jáne mádenı sabaqtastyqty saqtauda aıryqsha ról atqarumen qatar, tíldík ózgerís, ǵylymı oıdyń damuy jáne bílímníń ūrpaqtan ūrpaqqa jetkízílu úderísterí tūrǵysynan qūndy derekter ūsynady. Alaıda saqtau jaǵdaılarynyń jetkílíksízdígí jáne zamanauı tehnologıyalarǵa qoljetímdílíktíń shekteulí boluyna baılanysty qoljazba qorlaryn saqtau, júıeleu jáne sáıkestendíru úderísterínde bírqatar kúrdelí máseleler kezdesedí.
«Qoljazbatanu jáne tsıfrlyq gumanıtarıstıka» halyqaralyq jazǵy mektebí atalǵan máselelerdí sheshuge baǵyttalǵan. Baǵdarlama jas jáne tájírıbelí mamandarǵa arnaıy teorıyalyq jáne praktıkalyq kurs múmkíndígín ūsynyp, qoljazbalardy saqtau, restavratsıyalau jáne tsıfrlyq gumanıtarıstıka ádísteríne basymdyq beredí. Halyqaralyq jáne otandyq tájírıbení ūshtastyra otyryp, sala boıynsha tanymal jetekshí sarapshylardy shaqyrǵan būl jazǵy mektep qatysushylardyń, ásírese Qazaqstan men Ortalyq Azıyanyń qoljazba dástúrlerí men onyń zamanauı ǵylymı qoldanysyna degen qyzyǵushylyǵy men túsínígín tereńdetudí maqsat etedí.
Baǵdarlama
Jazǵy mektep jetí kúnge jalǵasyp, salalyq dáríster men semınarlardy jáne praktıkalyq tájírıbe almasudy qamtıdy. Baǵdarlama Ortalyq Azıyanyń qoljazba qorlaryn zerdeleuge baǵyttalǵan úsh negízgí taqyryptyq baǵytqa, atap aıtqanda qoljazbalardy zertteu ádísnamasy men dástúrleríne, restavratsıya men konservatsıya ádísteríne jáne qoljazbalardy zertteudegí tsıfrlyq gumanıtarıstıka tásílderíne basymdyq beredí. Baǵdarlama ayasynda Almaty qalasyndaǵy írí kítaphanalar men arhıvterge baru da qarastyrylǵan.
Ūıymdastyrushylar
Jazǵy mekteptí Q.A. Yasauı atyndaǵy HQTU Eurazıya ǵylymı-zertteu ınstıtuty, QR ǴJBM ǴK «Ǵylym ordasy» ShJQ RMK, Garvard unıversıtetíníń Devıs atyndaǵy Reseı jáne Eurazıya zertteulerí ortalyǵy, Astana IT unıversıtetí, Islam tarıhyn, ónerín jáne mádenıetín zertteu ortalyǵy (IRCICA) jáne Túrkıya Respublıkasy Qoljazbalar basqarmasy bírlesíp ūıymdastyrady.
Qatysu sharttary
Jazǵy mektep jas zertteushílerge, kítaphanashylarǵa, arhıv qyzmetkerleríne, restavratorlarǵa jáne muzeı mamandaryna, sondaı-aq qoljazbalardy zertteu salasynda bílíktílígín arttyruǵa jáne Qazaqstannyń qoljazba dástúrlerí boıynsha bílímín tereńdetuge qyzyǵushylyq tanytqan ózge de tūlǵalarǵa arnalǵan.
Qatysuǵa ótíním beru
Qatysu úshín motıvatsıyalyq hat (300-500 sóz) jáne túıíndemení qamtıtyn bíryńǵaı PDF-faıl túríndegí ótínímdí 2026 jyldyń 30 sáuíríne deıín eri-project@ayu.edu.kz elektrondyq poshtasyna joldau qajet.
Ótíním nátıjelerí 2026 jyly 4 mamyrda jarıyalanady.
Qarjylandyru
Jazǵy mektep BP28712621 «Qazaqstannyń qoljazba mūrasy: tírkeu, restavratsıyalau, ǵylymı katalogtau, tsıfrlandyru jáne keshendí kodıkologıyalyq zertteuler» jobasy ayasynda ótkízíledí. Ótíním negízdí bolsa, tolyq nemese íshínara jol shyǵyndaryn óteuge baǵyttalǵan shekteulí granttar qarastyrylady.
Barlyq qosymsha sūraqtar boıynsha o.hanayi@ayu.edu.kz nemese a.muratbekova@ayu.edu.kz elektrondyq poshtasyna habarlasuyńyzdy sūraımyz.