Almaty qalasynda qoǵamdyq jáne jol qaýipsizdigin arttyrý, sondaı-aq quqyq buzýshylyqtyń aldyn alý maqsatynda polısıa qyzmetinde ushqyshsyz ushý apparattary qoldanylýda, – dep habarlaıdy Aqshamnews.kz.
Halyq tyǵyz ornalasqan, kólik qozǵalysy qarqyndy ári qalalyq ómir belsendi ortada drondar zamanaýı ári tıimdi monıtorıń quraly retinde paıdalanylýda. Ushqyshsyz ushý apparattary qoǵamdyq oryndarda, kóshe-jol jelisinde, azamattardyń jappaı jınalatyn jáne olarǵa irgeles aýmaqtarda jalpy ahýaldy baqylaýǵa múmkindik beredi. Olardy paıdalaný qoǵamdyq tártiptiń buzylýynyń aldyn alýǵa, onyń ishinde usaq quqyq buzýshylyqtardy anyqtaýǵa, sondaı-aq tótenshe jaǵdaılarǵa jedel áreket etýge baǵyttalǵan. Drondardy paıdalaný naqty ýaqyt rejıminde bolyp jatqan jaǵdaıdyń obektıvti kórinisin alýǵa, adamdardyń shoǵyrlanýyn, qozǵalystaǵy qıyndyqtardy, qaýipsizdigi tómen ýchaskelerdi, abattandyrý qaǵıdalary men qoǵamdyq tártiptiń buzylýyn der kezinde anyqtaýǵa, sondaı-aq polısıa jasaqtarynyń áreketterin tıimdi úılestirýge múmkindik beredi. Almaty qalasy ákimshilik polısıa basqarmasynyń bastyǵy Serik Shýmaevtyń aıtýynsha, zamanaýı tehnologıalar polısıanyń profılaktıkalyq jumysynyń ajyramas bóligine aınalýda.
– Drondar – eń aldymen aldyn alý quraly. Olar bizge jaǵdaıdy keń aýqymda kórýge kómektesedi: tek joldarda ǵana emes, sonymen qatar qoǵamdyq keńistikterde – aýlalarda, alańdarda, adamdar kóp jınalatyn oryndarda. Mundaǵy basty maqsat – tártipti saqtaý, quqyq buzýshylyqtyń aldyn alý jáne Almaty turǵyndary men qonaqtary úshin qaýipsiz orda qalyptastyrý, – dep atap ótti Serik Shýmaev.
Polısıa departamentinde ushqyshsyz ushý apparattary qoldanystaǵy zańnama talaptaryna qatań sáıkes paıdalanylatynyn jáne olardyń qyzmeti azamattardyń qaýipsizdigin qamtamasyz etýge, qoǵamdyq tártipti qorǵaýǵa, sondaı-aq "Zań men tártip" qaǵıdatyn iske asyrýǵa baǵyttalǵanyn atap ótti.